EDITORYAL - Ang POGO ug kriminalidad

Nagkadaghan na og maayo ang mga Chinese nationals dinhi sa Pilipinas. Gikan sila sa nagkalainlaing mga probinsiya sa mainland China ug Taiwan nga miari dinhi aron manginabuhi pinaagi sa pagtukod og mga negosyo, empleyado ug isip mga turista.

Apan kadaghanan sa makita karong mga Chinese dinhi, gawas lang sa mga Tsinoys, ang kadaghanan kanila dili gyud turista kondili mga trabahante sa mga nagkalain-laing Philippine Overseas Gaming Operation o online casinos.

Mga probinsyano ug probinsyana silang mga Chinese gikan sa nagkalain-laing lugar sa mainland China nga nanimpalad ra pud nga makatrabaho dinhi aron dunay mapadala balik didto sa ilang mga pamilya.

Apan sa likod niini, dunay daghang mga dili maayong mga balita nga gikalambigitan aning mga Chinese dinhi.

Mga krimen nga wala kaayo ma-monitor ug mabantayi sa katilingbang Pilipinhon  kay ang mga biktima Chinese nga wala masuhito dinhi ug ang mga suspek Chinese sab nga duna nay daghang koneksyon dinhi.

Dunay mga kaso sa illegal recruitment sa mga probinsyanang Chinese nga nabiktima sab og mga illegal recruiters.  Ang mga responsible mga Chinese nationals ra sab. Giilad sila nga makatrabaho sa mga POGO dinhi sa Pilipinas apan sa prostitusyon sila napunta.

Sobra unom ka tuig na ang nakalabay dihang ang Banat News mipasidaan bahin sa pagtugot sa administrasyong Duterte nga pasudlon ang mga Chinese online casinos dinhi sa nasud nga gitawag na karon og POGO.

Ang pasidaan may kalabotan kini sa nahitabo sa nasud sa Myanmar kun diin dunay usa nila ka probinsya nga gitagana gyud para sa Chinese online gambling casinos, apan didto naghari ang Chinese criminal syndicates ug misaka ang kriminalidad ug midako ilang problema sa ilegal nga drugas.

Gipalayas sila didto sa Myanmar apan mibalhin sila dinhi sa Pilipinas kay may pagtugot sa administrasyon ni Duterte. Karon, dinhi na sab sila sa Pilipinas nagsamok-samok, nahitabo ang mga susamang krimen didto sa Myanmar.

Mga krimen sama sa pagpatay, kidnappings, extortion, ug ang kanunay nga pagkasakmit og mga kinilo nga shabu nga wala gyud sukad mahitabo nga ingon niana kadaghan ang masakmit matag operasyon sa mga otoridad.

Angayan na tingaling balikan sa mga magbabalaod kining POGO dinhi sa Pilipinas, kun nagkinahanglan ba gyud kita sa ilang buhis.