Pataka lang og tabi

Nakatilaw og kasaba sa mga kongresista ang dakong opisyal sa Philippine Health Insurance Corporation tungod sa iyang pag-ingon nga mabangkaruta na ang PhilHealth lapas sa 2027 kon way dugang pundo nga ihatag ang kagamhanan.

Kinsa gud tawon sa mga miyembro sa PhilHealth ang dili mabalaka nga nagpasabot man kini nga iniglapas na 2027, purdoy na ang PhilHealth? Sa ato pa, dili na makahatag og mga benepisyo kon ma-admit kita sa ospital?

Giangkon ni PhilHealth Officer-in-Charge Eli Dino Santos nga ang PhilHealth nagdawat og tabang salapi gikan sa Philippine Amusement and Gaming Corporation (Pagcor) ug sa Philippine Charity Sweepstakes Office PCSO).

Apan matud ni Santos nga kuwang gihapon kini nga kantidad aron nga ang PhilHealth makapadayon sa pagserbisyo sa tanan niining mga miyembro kon ma-ospital. Nakurat ang mga kongresista nga sakop sa House Committee on Appropriations.

Matud ni Santos nga kinahanglan nga ang nasudnong kagamhanan motagana og dugang budget para sa PhilHealth nga posibleng kuhaon gikan sa gitawag og “sin taxes,” kining buhis gikan sa mga softdrinks, ilimnong makahubog ug sigarilyo.

Makapasubo gyud ang maong pamahayag ni Santos. Maayo gani kay ang vice chairman sa House Committee on Appropriations usa ka ekonomista, ug maayong mosabot sa isyu kabahin sa kuwarta.

Nasakpan ni Mariquina 2nd District Congressman Stella Quimbo nga way basehanan ang pamahayag ni Santos. Gipangutana ni Quimbo si Santos kon pila ang koleksyon sa PhilHealth sa miaging tuig, 2021.

Gitug-an ni Santos nga sa miaging tuig, ang PhilHealth mikolekta og P171.2 bilyones nga kontribyusyon gikan sa mga sakop nga kawani sa kagamhanan ug pribadong sektor.

Migasto usab ang PhilHealth og P140.2 Bilyones nga benepisyo ngadto sa iyang mga sakop, unya ang operational expenses nila miabot lang og P7.8 Billion.

Sa ato pa, wa gyud diay maalkanse ang PhilHealth ug dili tinuod ang panagna ni Santos. Tungod niini, gikasab-an si Santos ni Kongresista Quimbo kay ang iyang pamahayag makapahadlok sa mga miyembro sa PhilHealth.

* * *

Usa sa nakadako og gasto sa PhilHealth kay dihang kusog pa kaayo ang Corona Virus Disease, dunay mga badlongong opisyal nga bisan ang dili Covid, ibutang gyud nga Covid aron makagasto ang kagamhanan.

Kay dili tinuod? Daghang opisyal sa PhilHealth ang nag-atubang karon og kaso nga gipasaka sa National Bureau of Investigation (NBI) ug anaa pa sa hukmanan.

Bisan ang mga kabanay sa namatay nahibulong nganong Covid man ang gibutang nga namatyan pag-abot sa PhilHealth nga sa death certificate dili man.

Ambot, unsaon pagpasabot niana sa mga opisyal nga gikiha. Usbon nako, kamong mga sakop sa PhilHealth, ayaw mo kahadlok.