Gidayeg nako si Cebu City Mayor Michael Rama tungod kay nahukman niya nga ibalik ang karaang plaza diha sa gitawag og Freedom Park nga kaniadto kabahin sa Plaza Washington.
Nakakita ko sa hulagway sa karaang Plaza Washington nga diha mahimutang ang barracks sa mga sundalong Amerikano, ug mao nga ang unahan sa Freedom Park gitawag og Warwick Barracks.
Nahuman na ang paghawan sa daghang mga tindahan nga diha gipahiluna sa Freedom Park, ug hapit na mahuman ang paghimo sa nindot kaayong public plaza sa maong dapit. Nindot man gud kaayo nga ang usa ka siyudad dunay daghang plaza.
Nalipay sab ko nga nakakita nga dunay mga nagtrabaho sa pagpanindot sa mga center islands sa mga karsada diha sa North Reclamation Area nga sa dugay’ng katuigan gipasagdan ra gyud.
Basta kon molihok lang ang mga tawo nga gitugyanan ni Mayor Rama sa lainlaing gimbuhaton, sigurado nga molambo gyud ang atong siyudad.
Ang Traffic Management Board way puol sa paghimo kanunay og miting kada semana aron pagtuki sa mga pamaagi nga mohapsay ang atong karsada.
Pagka karon, ibalik na pagpatuman nga ang mga PUJ anha ra gyud mopasakay ug magpakanaog og mga pasahero sa mga designated PUJ Stops.
* * *
Ang MCWD nga ubos ni Chairman Jose Daluz III ug General Manager Stephen Yee nangita gyud og paagi nga madugangan ang suplay nato sa tubig.
Tuod man, karong buwana, kon wa lay kanunay’ng pag-uwan nga makabalda sa trabaho, mora’g moagas na ang tubig nga gikan sa Barangay Lusaran.
Unya, duna pay mga water desalination projects nga makapadugang sa atong suplay sa tubig. Layo ra gyud kaayo ang miaging MCWD Board nga ang katawhan nag-antos sa kanihit sa tubig.
Karon sa administrasyon ni Mayor Rama, gisugdan na ang pagpanghawan sa kasapaan ug ang giuna mao ang Kinalumsan River nga wa gyud ni mahimo kaniadto.
Hinuon, dili gyud malikayan nga duna gyuy mga tawo nga mosaway sa administrasyon ni Mayor Rama, apan ang pangutana, kinsa man ang mga nanaway?
Ang mga nanaway mao ang mga tawo nga kaalyado sa kanhi administrasyon nga klaro kaayo og unsay rason sa ilang pagpanaway.
Nganong kaniadto hilom ra man sila dihang nagnihit og tubig ang katawhan? Nganong hilom ra man sila nga grabe ang problema sa trapiko? Nganong wa man sila moreklamo nga kanunay’ng dunay lunop dinhi sa siyudad?
Kini maoy timan-i ninyo. Bag-o pa si Mayor Rama sa katungdanan pagbalik niya pagka mayor, apan duna nay makita nga kausaban sa siyudad.