Alang kang National Security Adviser Clarita Carlos mas maayo nga magsuwat na lang og bag-ong Konstitusyon kay ang tagi-tagi nga pag-amendar niini pag-usik-usik lang sa panahon. Dugang pa ni Carlos, kritikal ang pagbalhin ngadto sa federal system tungod kay ang kasamtangan’g estruktura wala na mahaom sa atong kahimtang ug kinaiya. Angayan nga repasohon ug usbon ang Konstitusyon. Sugdan ang maong kausaban pinaagi sa pagpapha sa abog sa mga panid diin kini nahisulat ug sa paggamit sa Konstitusyon sa tinuod niinin’g katuyoan. Kay ginaingon man nga “ang labing dakong hulga sa kagawasan mao kadto’ng kagamhanan nga gipasagdan lang ang batakan’g balaod.” Cha-cha na!
Relihiyon ang gitanyag
Miangkon si Manila Archbishop Cardinal Jose Advincula nga adunay “mangitngit ug halapad nga gintang” tali sa Simbahan ug sa mga kabus sa atong nasud. Dugang pa sa Cardinal, ang simbahan wala makaila sa mga kabus, sama nga ang mga kabus wala makaila sa simbahan. Makapahibulong nga luyo sa pagbansag sa Pilipinas nga nag-inusarang Katoliko nga nasud sa Asia, kuyanap gihapon ang krimen, kurapsyon ug ubang kahiwian sa katilingban. Dunay punto ang panahom nga “Ang tawo mosulod sa simbahan sa tuyo nga makaplagan niya ang Diyos, apan inay Diyos, relihiyon man hinuon ang iyang nakaplagan didto”. Madahaaan!
Abswelto na daan
Nagsugod na ang DTI-Central Visayas sa pag-monitor sa gipamaligya nga mga Christmas decorations, sama sa series lights, karon nga nagsugod na usab ang “Ber months.” Matud pa sa DTI sagad sa magbaligya’g mga substandard nga series lights mao kadtong gagmay’ng tindahan kay kuno ang mga dagkong department stores nagtuman man kanunay sa lagda. Giabswelto na man daan sa DTI ang mga dagkong tindahan. Dili maayo nga adunay paboran ang gobyerno ni’ng maong hisgutanan. Kay sumala sa kasulatan, “bisan gani ang maayong tawo, makasala man tungod lang sa usa ka pirasong tinapay.” Fezteleern!
Hiniusang pakibatok sa COVID
Nahingawa ang Department of Health sa posibilidad nga nakahimo ang dakbayan sa Sugbo og dili maayong panig-ingnan sa giluwatan niini nga polisiya sa boluntaryo’ng pagsul-ob sa facemask. Ni’ng managlahi nga katuyoan sa DOH ug sa dakbayan sa Sugbo, dili ba gyud kaha mag-abot ang “luwag ug ang kasili”? Hinoon, ginaingon man nga ang panagsumpaki maoy sinugdanan sa pagka-matngon. Busa dili angay lantawon ang isyu nga panagbangi tali sa DOH ug sa dakbayan sa Sugbo kon dili usa ka hini-usang pakig-away batok sa COVID-19. Owrayt!
You can do magic?
Gibalik na sa ilang pwesto ang unom ka opisyales sa Bureau of Customs nga girelibohan tungod sa giingon’g pagpayuhot sa liboan ka sako’ng asukal didto sa pantalan sa Subic. Napamatud-an human sa imbestigasyon nga lehitimo diay ang mga dokumento sa maong importasyon ug nga walay pagpabaya nga nahimo ang mga naasoy’ng opisyales. Makapalibog kini. Buot ba ipasabot nga diha na nasayri kon lehitimo ba ang papeles human sa pagrelibo? Hinaut nga wala’y magic nga nahitabo atol sa imbestigasyon. Apan magic man o wala, swerte gihapon ang hingtungdan’g customs officials. Ayooos!