EDITORYAL - Responsibilidad sa tawo ang kaugalingon

Daghan ang nahinangop sa pagpagawas ni Cebu City Mayor Michael Rama og executive order nga dili na mandatory ang pagsul-ob og face mask sa gawas sa panimalay. Ang iyang kamandoan may pagka-parehas sa mando sab ni Gob. Gwendolyn Garcia pipila ka buwan na ang milabay nga miani dayon og sagul-sagol nga reaksyon gikan sa mga nasudnong opisyales ilabi na sa Inter Agency Task Force, Department of Health ug sa Department of Interior and Local Government.

Sama sa rason ni Garcia, ang gihimo ni Rama mandato kini mga lokal nga kagamhanan ang paghimo og rasonable ug maayong desisyon para sa ilang ginsakupan subay sa Local Government Code, usa sa mga lig-ong basihan sa mga local chief executives aron mohimo og kaubalingong mga direktiba para sa kung unsay nakita nilang makaayo sa ilang ginsakupan.

Dili unta kini sabton sa mga nasudnong opisyales nga kini paghagit o pagbangga sa ilang gahom o posisyon kundili pagsunod lang kini sa mga local chief executives sa kun unsay gihatag nga gahom kanila sa balaod.

Basta ang tan-aw sa mga mayor o gobernador dili mabutang sa peligro ang katawhan ug ang health care system sa ilang lugar angay tingaling tahuron sa nasudnong kagamhanan ang kagawasan sa mga local government units. Sugod kagahapong adlawa, Septiyembre 1,2022 dili na kinahanglang magsuot ang mga tawo sa Cebu City og facemask kun mogawas sa ilang balay o kun naa sila sa karsada.

Apan ang mga establisamento gihatagan og kagawasan paghimo og kaugalingong polisiya kun tugotan na ba nila ang mga customer nga dili magsuot og facemask o padayunon ang pagpasuot niini.

Ang mga klinikan, tambalanan ug uban pang medikal nga pasilidad pabiling i-require ang mga tawo nga magsuot niini. Sa laktod nga eksplinasyon, ang katawhan na maoy responsible sa kaugalingong kaluwasan o proteksyon kun mogawas sa ilang balay. Naa na kanila pagtan-aw sa sitwasyon kun gikinahanglan silang magsugot niini o dili.

Base sa mga bag-ong natala nga mga kaso sa coronavirus disease (COVID-19) nagkagamay nalang ang natakboyan niini nga niresulta sa ilang kamatayon.

Nakita nga ang bilyones pesos nga gigasto sa gobiyerno alang sa Covid-19 vaccine matawag nga epektibo gyud ug wala mausik. Mao sab ni ang usa sa gisaligan nilang Rama ug Garcia nganong nipagawas sila sa maong kamandoan.