Ang tanan anaa na sa atong atubangan

Sa pagsugod pa lang daan sa atong pagkahimugso dunay giandam nang daan nga mga kahimanan sa atong paglambo. Mahimong kining maong kahimanan mao ang mga butang, mga tawo, panlantaw.

Sa laktod ang matag palibot diin kita sakop ang nahimong usa ka mahinungdanong kabahin sa atong panaw. Sa laktod anaa ang kalambigitan.

Kining maong kalambigitan maoy nakahatag og kinabuhi ug kusog sa matag hukom nga atong pagahimoon.

Ang matag desisyon nga atong pagahimoon makapadani sa bisan unsa ug ni bisan kinsa nga mamahimong kabahin sa maong desisyon nga atong pagahimoon.

Ug kun sila nahimong usa na kanato mamahimong mas espirituhanon ang panaw sa kinabuhi.

Ang maong panaw nga espirituhanon nakahatag og tumong sa atong kinabuhi.

Dili na kinahanglan nga sa layo kita mangita. Kining maong pagpangita sa halayo nagpaila lamang nga nahimo kitang buta sa tabunok nga  bahandi nga giladlad sa atong atubangan.

 Kining maong pagkabuta maoy nakapalangay sa atong personal nga paglambo.

Nahimong mas masakitan kita labina kun magsugod kita pagtandi sa atong kaugalingon ngadto sa uban. Mosulod ang pagmahay, dayon ang kalaay. ang kalaay nga nakapasamot sa atong kaluya.

Diha sa pag-ampo atong makita nga ang tanan diay dunay pulos ug tumong. Ang tanan pinaagi sa pag-ampo mamahimong buhi ug dili kay buhi mamahimong mapuslanon usab.