EDITORYAL - Kagawasan nga naabusar

Dili kalikayan nga mobalik sa panumdoman sa mga Pilipino ang pagdeklarar og Martial Law sa kanhi diktador Ferdinand Marcos, amahan sa kasamtangang presidente nga si Ferdinand “Bongbong” Marcos Jr.

Karong bulana Septiyembre sa ika petsa 21 mao ang anibersaryo sa pagdeklarar ni Marcos og Martial Law niadtong tuig 1972.  Si Marcos miingon nga mao nalang kadto ang bugtong niyang mabuhat aron luwason ang nasud gikan sa nagkakusog nga pwersa sa komunismo, rebelyon didto sa Mindanao ug sa walay hunong nga mga krimen dinhi sa nasud.

Apan atol sa Martial Law daghang mga nabiktima sa pagpangabuso sa mga naa sa posisyon partikularna  sa military ug kapolisan diin daghang biktima sa paglapas sa tawhanong katungod.

Bisan ang media, wala palabya ug gipasirad-an ang mga sibyaanan, estasyonan sa telebisyon ug mga pamantalaan nga kritikal sa administrasyon ni Marcos.

Karong bulana dinhi sa Sugbo, ang mga sakop sa local media magsaulog sa Press Freedom Week agi og pagtimaan sa Martial law. Si Press Secretatry Trixie Cruz-Angeles, sa iyang giluwatang posts sa Facebook, mipasalig nga ang administrasyong Marcos karon moila ug motahod sa kagawasan sa pagpadayag.

Ang Republic Act 11699 nga gipirmahan ni kanhi presidente Rodrigo Duterte o National Press Freedom Day saulogon matag ika-30 sa bulan sa Agosto.

Si Angeles miingon nga magpabilin ang kagawasan sa media ubos sa pamunoan ni BBM. Kung unsa kadako nga kagawasan ang gipasabot niini wala pay klaro kun asa kutob.

Tinuod dunay kagawasan nga natagamtaman ang mga sakop sa media sa Pilipinas, apan dili ikalimod nga sa nakalabay nga administrasyon, Kritikal kaayo kini ngadto sa mga tigbalita. Dunay mga importanteng impormasyon nga gikinahanglang kuhaon isip kabahin sa trabaho sa media ang malisod nga kuhaon.

Para man unta kini sa kaayohan sa publiko kay katungod nilang masayod sa mga panghitabo sa gobiyerno niini isip mga magbubuhis.

Karon ang kagawasan naabusar na tungod sa social media nga ang mga impormasyon, balita, kung dili bakak, gituyo aron tuison ang tinud-anay nga hitabo.

Subo lang nga duna gihapoy ganahan og mga ingon ani nga basahon, samtang ang mainstream media maoy gihimong bati.