Child custody

Dear Atty. Divine,

Ang akong apo gibilin  diri nako sa dihang kini bag-o pa nga natawo kay ang inahan milarga sa abroad samtang ang amahan sa bata nga akong anak nanarbaho sab. Ako maoy nagpadako sa bata hangtud karon nga 5 anyos na ang akong apo. Karong bag-o miuli ang inahan ug miduaw sa bata ug misulti siya nga di na gyud sila magkasabot sa akong anak busa kinahanglan na gyud sila nga magbuwag. Ang plano sa inahan nga iya nang kuhaon ang bata. Naluoy ko sa akong apo kay di man gyud siya moduol sa inahan kay wa man siya kaila niini kay ako may nagpadako sa bata. Ang akong pangutana, aduna bay paagi nga akong mapugngan ang pagkuha sa inahan sa akong apo? Unsay angayan nako nga buhaton? Daghang salamat. — Lily

Dear Lily,

Basi sa balaod og sa mga desisyon sa Korte Suprema, ang mga ginikanan sa bata mao gyud ang mas dunay katungod nga mo custody sa bata. Matud sa labaw’ng hukmanan nga ang parental authority sa mga ginikanan dili mamahimong ika-transfer ngadto sa laing tawo gawas lang sa kaso sa adoption, guardianship o kun ang bata gi surrender sa usa ka children’s home or  institution. Sa imo nga kaso, kun ang bata gitugyan sa inahan ang custody diha kanimo sa dihang kini bag-o pa nga natawo, makonsiderar kini nga temporary lang ang iyang pagtugyan sa custody sa bata nganha kanimo ug busa bisan unsang orasa mamahimo niyang kuhaon pagbalik ang bata. Basi sad sa atong Family Code kun ang bata illegitimate, ang inahan niini ang adunay sole parental authority. Busa wa gyud tay mahimo kun kuhaon sa inahan ang imong apo. Ang maayo nimong buhaton mao ang pagpakigsabot sa inahan nga kun kuhaon niya ang bata, tugutan ka niya nga makabisita or tugutan niya ang bata nga makapuyo sa inyo panahon sa bakasyon. Mas maayo nga makigsabot ka nalang sa inahan inay nga imong babagan ang iyang tinguha sa pagkuha sa bata. Thank you and God Bless! —Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.