EDITORYAL - Ang insurhensiya sa Pilipinas

Upat ka mga patay’ng lawas na usab ang nakuha sa mga otoridad gikan sa kadagatan sa mga isla sa Tarangan ug Sto. Niño sa Samar niadtong adlaw nga Biyernes, ang lugar diin matud pa nagka-engkwentro ang mga tropa sa kasundalohan ug mga gituohang sakop sa New People’s Army.

Sa mga unang report, gikatahong sakay ug posibleng naapil sa nakalas ang magtiayong sila si CPP-NPA-NDF chairman Benito ug secretary general Wilma Tiamzon uban sa ilang mga kaubanang rebelde. Unom na ka patay’ng lawas ang narekober sa lugar.

Gituohan sa kasundalohan nga nagkarga og mga eksplosibo ang maong pumpboat ug sa sinukliay og bala niulbo kini maong nabungkag.

Ang gobiyerno dugay ng nagsige og panawagan ug niawhag sa mga rebeldeng NPA sa pagtahan ug mobalik sa sabakan sa balaod tungod kay ang giyerang ilang gipakigbisogan wala nay kapuslanan karon.

Aron maatiman diha sa mga lokalidad ang mga yangungo sa katawhan ug paghatag og kahigayonan sa mga aktibong rebelde nga mobalik sa sabakan sa gobiyerno gitukod ang National Task Force to End Local Communist Armed Conflict (NTF-ELCAC).

Tungod sa NTF-ELCAC daghang mga rebeldeng NPAs lakip na mga lider sa mga gerilya niini ang nitahan na sa gobiyerno.

Ang maong insurhensiya pila ka dekada na ug nikalas na og daghang kinabuhi ug nakaguba og mga kabtangan  ug kaugmaon sa mga kabataang nahaylo.

Kadtong mga mitahan gihatagan og panginabuhian lakip ang pagpaeskuyla sa ilang mga anak. Ang mga mitahan  miingon nga gikapoy na sila, gutom, ug walay kasigurohan ang kadaogan.

Gani, dunay mga lumad didto sa Mindanao nga kaniadto sakop sa NPA ang sakop na karon sa Armed Forces of the Philippines.

Dako og natabang kining mga farm to market roads, health centers, mga eskuylahan, kuryente, komunikasyon diha sa kabukiran ug mga hilit nga dapit.

Kay ang mga kabus nga maguuma makakwarta naman sa abot sa ilang pananom ug makataboktabok na sa patag kada adlaw aron manginabuhi.

Usa sa mga rason kaniadto nganong nidaghan ang NPA mao ang kakulangon sab sa gobiyerno pagtagad sa mga basic services nga gikinahanglan sa mga tawo sa mga hilit nga dapit.