Pagdayeg alang kanimo

Kini maong awit nga kasagarang awiton panahon sa Kwaresma. Niadtong bata pa ako kanunay ko kining awiton labina niadtong sakristan pa ako. Ang maong awit nagkanayon:

Koro

Pagdayeg Alang Kanimo Ginoong Jesukristo/Hari sa Himaya nga walay katapusan

1. Ang pulong mo O Ginoo among kahayag ug kaluwasan (Koro)

2. Ang gugma O Ginoo among kalipay ug kalauman (Koro)

3. Ang Krus mo O Ginoo among kaayohan ug kaakuhan (Koro)

Sa akong panaw ingon nga pari sulod sa napulog unom na ka mga tuig, akong nakita nga usahay nahiklin ang Ginoo sa akong kinabuhi.

Ang mga personal nga pangandoy mahimong motuyhakaw diha sa panaw.

Ug kining maong awit nakapadasig kanako sa pagpatidlum ning mosunod nga linya:

Ang pulong sa Dios ingon nga kahayag tungod kay giya man kini alang sa mas tunhay nga panaw ug kaluwasan sanglit halayo sa Dios wala man gyud kitay mahimo.

Dunay mga higayon nga mahuptan nato ang sayop ug mabaw nga pagsabot kalabot sa seguridad. Nagtuo kita nga ang salapi mao ang atong seguridad apan sa kaulahian siya mahurot lamang o dili ba kaha makawat. Kawang lamang ang tanan.

Nagtuo kita nga kaambong atong salimbong apan sa kaulahian ang uban niini malimbongon.

Husto gyud si St. John of the Cross sa iyang pag-ingon:

Say Nothing, Think Nothing, Desire Nothing.