EDITORYAL - Kinsa may matawag  nga “indigent”

Ang gidaghanon sa mga tawong nagdasok sa nagkadaiyang payout centers sa DSWD alang sa ayudang ipanghatag para sa mga kabus nga tinun-an sa nasud, nagpakita lang nga daghan gyud kaayong sa mga Pilipino ang naa sa krisis sa pinansiyal nga panginahanglan karon.

Ang DSWD nigahin og P500 milyones nga pundo alang sa mga tinun-ang na-enroll karong tuiga. Sila kadtong mga ‘indigent” nga mga tinun-ang walay kapasidad nga makapamalit og gamit para sa ilang pagtungha tungod sa kakabus sa ilang pamilya, ilabi na dunay pandemya ug bag-o lang naigo sa bagyong Odette.

Samtang tuod makalibog man gud niini, managlahi man og interpretasyon ang mga ahensiya sa gobiyerno kun unsa o kinsa ang matawag nga “indigents.” Ang DSWD adunay kaugalingong interpretasyon para makadawat sa maong ayuda.

Ang tinun-an nga hatagan sa ayuda mao kadtong naa tungatunga karon sa krisis. Krisis sa pinansiyal tungod ba kaha sa kagamay sa sweldo sa ilang mga ginikanan o ba kaha wala gyud kini kapangayoan og ipalit og gamit.

Apan sa Memorandum Circular No. 2019-11 ug MC No. 2022-015  sa DSWD aron dili malibog ang publiko, ang indigent nga mga tinun-an nga mahimong makadawat sa maong ayuda mao kadtong mga biktima sa demolisyon o abuso, gisaligan sa pamilya, anak sa mga OFWs, anak sa mga ginikanang walay trabaho, anak og solo parent,mga nabiktima sa katalagman; working student, PWDs, anak sa mga rebel returnees, anak sa mga bilanggo, mga tinun-ang dunay HIV o anak sa mga tawong adunay HIV.

Husto ang gihimo ni Sec. Irwin Tulfo nga pagtangtang na sa rekisitos anang certificate of indigency kay pagkatinuod nagdugangdugang lang kini sa kahasol ug balayrunon sa uban, ang gikinahanglan nalang mao ang balidong ID ug enrollment certificate nga kini nagpamatuod nga na –enroll kini.

Apan dili kaha sab kini moresulta unya nga dunay mga dili gyud tinud-anay nga kabus ang pamilya unya maoy mahatagan sa ayuda? Inay matabangan ang nagkinahanglan gyud dili na hinuon kay mahurot man ang pundo. Ang social worker na hinuon nga mointerbyu sa mga tinun-an maoy modesider kun tinud-anay ba nga nagkinahanglan og tabang sa gobiyerno ang niduol kanila. Medyo anhing dapita posibleng magkaproblema.