Tubig dagat nagtubo

Daghang lugar sa Kabisay-an ang gipanglunopan diha nga mibunok ang kusog kaayong uwan kaniadtong Huwebes sa gabii. Dili ra kay dinhi sa Cebu City ang kusog nga uwan, kondili, apil na sa ubang mga dapit sa Kabisay-an. Maghinuktok ko pirmi kon nganong maglunop man gyud dayon kon mag-uwan. Gawas nga migamay na ug mabaw na kaayo ang agianan sa tubig paingon sa dagat, tan-aw nako, mora’g miunlod usab og gamay ang atong yuta, o kaha misaka ang tubig sa dagat.

Tungod niini, kon mag-uwan, hinay na ang pag-agos sa tubig paingon sa dagat. Nakadungog na tingali mo nga tungod sa naghinubra nga kainit sa panahon, ang mga ice sa dagat didto sa ubang bahin sa nasud, nangahilis na.

Mao ni nga mitubo ang tubig sa dagat ug maglisud na pag-agos ang tubig sa atong kasapaan. Kon ingon man gani niini ang sitwasyon, unsa may sulbad niini?

Makaingon ta nga husto ang gihimo sa uban nga tua na naghimo og balay sa bukid aron nga makalikay sila sa pagbaha sa mga lupa nga bahin.

Apan, apektado gihapon kita kay kon mosuroy ta sa downtown area, makasinati man gyud ta sa epekto sa paglunop ug pagbaha. Kini maoy rason nga gusto gyud unta ko nga makaapil sa grupo sa mga empliyado sa Cebu City government nga gitahasan pagsulbad niining maong problema aron makatabang sab ko.

* * *

Makapakitbi sa atay ang talan-awon sa aksidente nga nahitabo didto sa usa ka bahin sa Mindanao (matud pa sa General Santos City) nga pwerteng daghana sa mga patay sa aksidente sa sakyanan. Mora’g Hi-Ace van nagkadam-ag ug ang dakong sakyanan, ug resulta, ang van pwerteng gubaa ug ang mga pasahero nagkatag sa karsada nga mga samaran.

Ang uban deritso nga namatay, samtang ang driver sa van nagbitay samtang nagkaob, nga nagsul-ob pa og seatbelt. Sa pagsuwat nako niini, wa pay kompletong detalyi sa hitabo.

Gisuwat ko kini aron nga pahinumdoman ang mga driver sa sakyanan nga kon anaa mo sa highway, kalma lang, ayaw kaayo pagpakusog sa pagpadagan.

Ang aksidente mahimong malikayan kon magmatngon lang. Busa, timan-i ninyo mga driver, nga anaa sa inyong mga kamot ang kinabuhi sa inyong mga pasahero.

Usbon nako, kalma gyud sa pagmaneho ninyo sa sakyanan, ilabi na kon daghan ang inyong mga pasahero. Usa lang ka sipyat sa pagkarkulo sa driver, makamugna na og aksidente nga posibleng makamugna og makalilisang nga hitabo.