(Balita Sagol Panahom)
Mipasalig ang Marcos administration nga menosan na ang pagpangutang kay ang kagamhanan adunay giingon nga fiscal space ug takus makapundo sa mga dagkong proyekto. Mo-focus usab ang administrasyon sa maayong pagdumala sa buhis aron makatigum og dugang pundo. Masayran sa umaabot kon matuman ba kining maong pasalig. Kay ginaingon baya nga “Ang utang ug ang bakak sagad magkuyog gayud”. Apan dili pud tingale maayo nga impason dayon ang utang kay ginaingon man usab nga “Ang tawo nga nakabayad na sa iyang utang, danay mahikalimtan”. Madahaaan!
Bahala’g Mômô, basta sikat
Mipasaka og laing balaodnon si Negros Oriental 3rd District Representative Arnolfo Teves , Jr., nga magsilot sa “ghosting” diin ang usa ka tawo o ‘higala’ kalit lang mohunong sa iyang komunikasyon ngadto sa usa ka tawo. Sama sa nahauna niyang balaodnon nga buot usbon ang ngalan sa NAIA, nakaani usab og mga pagsaway ang kongresista niining iyang bag-ong giproponer nga balaod. No retreat, no surrender si congressman. Mao na’y giingon nga “bahalag mausamod basta sikat”. Haum kaniya ang pahimangno nga “Walay pulos nga magsige ka’g yatak sa brake kon nahayang ang imong sakyanan”. Pagkatoytoy!
Padayon ang kakabus
Nangandak si Socio-economic Planning Secretary Arsernio Balicasan nga paingon ng ang Pilipinas nga mahimong upper-middle-income country sa tuig 2024 kon magpadayon ang kasamtangang ekonomikanhong paglambo. Bisan makab-ot ang maong tumong, mahimo nga wala kini kapuslanan kon ang kahamugaway alang lang sa pipila ka banay apan daghan gihapon ang mag-ila-id sa kalisod. Kay ginaingon nga, “Padayon ang kakabos sa katawhan tungod kay ang gitahasan pagsulbad niini wala makakita ni makapuyo sa maong kahimtang”. May’pag moligeed!
Nagkadako nga deficit
Nasayran nga sa nangaging duha ka bulan, midako ang budget deficit sa atong kagamhanan ngadto sa P215.5 bilyones. Gumikan kin sa dako nga gasto itandi sa nakolekta nga buhis. Hangtud nga makat-on kita pag-gasto lamang sa kon unsay atong makaya, padayon gayod nga masinati sa kagamhanan ang budget deficit. Haum sa atong kahimtang ang pagya nga “Ang budget nagtug-an kanato kon unsa ang mga butang nga dili nato makaya apan dili kini makapugong nga paliton kini”. Saoonz!
Specialty Hospitals
Pinasikad sa pamahayag sa Presidente sa iyang SONA, gihingusgan usab ni Mayor Michael Rama nga mahimong specialty hospital ang CCMC. Maanindot nga konsepto ang specialty hospital. Apan dili usab hikalimtan nga dangpanan sa mga kabus ang CCMC kansang sakit nagkadaiya. Kining konsepto sa specialty, makapahinumdum sa usa ka restaurant nga nahimutang kilid sa arena diin ipahigayon ang bullfight kansang specialty mao ang bulalo nga ginama sa itlog sa baka nga kinaham sa mga patron nga gikan mitan-aw sa bullfight. Usa ka higayon, nahibulong ang regular nga customer ngano nga gamay ang itlog nga gisagol sa bulalo busa nangutana siya sa tag-iya, kinsa mitubag sa pag-ingon, “Senior, usahay modaug man pud ang toro”. Unswaa