Ang pulong relihiyon gikan man sa pulong Latin Religare nga sa ato pa to give order kun han-ay. Sa ato pa ang relihiyon gyud unta ang maghatag og giya sa kinabuhi sa tawo kun katawhan. Apan lahi na karon. Sa hinayhinay nahimong daw nagkahanaw ang iyang gahum ug inpluwensiya ngadto sa mga tawo. Tungod ba kaha tungod kay halayo siya sa katawhan. Tungod ba kaha kay ang pagtulon-an malisud dawaton sa kinabag-an? Tungod ba kaha kay walay igong pagsaksi ang iyang mga kaparian ug ang nagkadaiyang seglar nga kaniya nag-alagad? Ang anaa sa akong hunahuna mao man ang atong Katolikong Simbahan.
Kaniadto buot kitang mamahimong batid sa disiplina sa teolohiya ug pilosopiya. Buot kitang batid bisan gani sa pinulongan. Buot kitang mamahimong ngilngig sa atong pagpamuhat. Ug buot kitang mamahimong inila diha sa mga butang nga atong natukod ingon nga Parokya o dili ba kaha Artsiydiyosesis. Daghan nang mga seminars ang nahimo ug mga kalihukan pagpadayag sa tinguha nga mamahimong mahinungdanon gihapon labina sa mga ubos nga mga sakop sa atong relihiyon. Ug daghanan kanato ang buot mamahimong aktibo for the Lord kuno diha sa pagtabang ug paghalad sa kaugalingon apan dunay gipaabot nga balus gumikan sa ilang kamanggihatagon. Ang naghinobrang pagsalig maoy makapahimo sa tawo nga magisa sa kaugalingon niyang mantika.
Dili pa tingali ulahi ang tanan. Kun maghisgot kita og radikalismo kun gikan mismo sa gamot mahinungdanon ang pagbalik puyo sa tinud-anay nga diwa sa atong pagka-sumusunod ni Kristo ug kini naglambigit ning mosunod:
1. Pagsanong sa panginahanglan sa atong isigkaingon. Ang presensiya pa lang daan gamhanan na.
2. Pagsaulog sa liturhiya sa paagi nga makapadala sa matag tawo ngadto sa mas suod nga relasyon sa Ginoo.
3. Pagtudlo sa Ebanghelyo pinaagi sa paghimo sa kaugaingong kinabuhi ingon nga ebanghelyo.
4. Ang pagsaksi nga mahimong dunay ngipon tungod kay gipuy-an man nga matinud-anon. Preaching by example matud pa. Nahilom ko ug namalandong pag-ayo kun diha sa akong pagpangalagad unsa man ang nahimo kong nakapahimong buhi sa pagtuo nga akong nadawat kaniadto ug karon. Unta tanan.