Mas lami ang paghatag kay sa pagbawi

Bisan usa ka butang niining kalibotana, walay maato sa hingpit. Salapi? Bahandi? Gahom? Pastilan, temporariyo ra gyod ning gipagunitan nato sa Ginoo. Kay ibilin ra gyod ning tanan inig kamatay nato.

Angay hinumdoman kanunay. Nga kita gikan ra sa abog. Ug mobalik ra usab ta sa abog oras nga Iya na tang kuhaon. Ang nakalahi lang, kay kitang abog nga Iyang gihimong tawo, adunay lawas ug kalag. Diin ang lawas ray madugta dinhi sa yuta samtang ang kalag moatubang Niya aron hukman kon asa ta Niya ibutang sa sunod kinabuhi nga wala nay kataposan base sa unsay atong binuhatan?

Panahon sa eleksiyon, manggawas ang daghang kuwarta sa mga kandidato aron ipanghatag sa katawhan. Gikan sa pagkaon ngadto sa mga sinina, gipang-apod-apod ngadto sa mga kabos. Pero pagkaliwas sa piniliay, sa mopuli nag lingkod ang nakadaog, unsay gihimo sa napildeng gipulihan? Matud pa sa kasaligang tinubdan, ang in-coming mayor mipasangil sa napildeng incumbent, nga mihimulbol sa ilang municipal mayor’s office.

Kon mosultig himulbol, atong maimadyen ang hitsura sa manok nga gihimulbolan – haska gyong ngil-ara diay? Hain na ba ang gisaad nga maayong pagpangalagad sa katawhan panahon sa kampanya? Kalit ra ba diay kining makalimtan kon mapilde? Dili ba, angay ipakita gihapon ang kalumo sa kasingkasing diha sa pagkamanggihatagon bisag pildero?

Hinuon, ang out-going mayor mipahayag, nga tanang gikuha niyang butang gikan sa nahisgotang opisina, dili iyaha sa gobiyerno. Sanglit, personal mang kuwarta ang iyang gigamit-gasto niini. Diin, may dokumentong legal siya nga ikapakita agig ebidensiya.

Busa, kay iyaha man ang maong mga gamit, natural, iyang dad-on sa ilaha. Ug iyang giklaro, nga wala niya idonar sa gobiyerno ang maong kabtangan. Husto ba ang nakab-ot niyang desisyon?

Anugon! Kon wala lang unta niya kuhaa ang naasoyng kabtangan, kutob sa mosulod sa mayor’s office nga makagamit-makakita niini, mahinumdom gyod sa iyang kaayo. Ug ipanabi pa, nga usa siya ka buotang mangangalagad. 

Ikalipay pa gyod kini sa atong Ginoo. Ug niya, mismo, nga kinasingkasing mohatag. Kay mas lami baya ang matagamtamang matang sa kalipay diha sa paghatag, ikomparar sa pagbawi ning mga butang nga mapuslan sa katawhan. Kaanindot unta, kon ang kamanggihatagon maoy mopatigbabaw.