Hulyo 17, 2022: Ikanapulog-unom nga Domingo sulod sa tuig
Mga Pagbasa: Gn. 18;1-10a/Sal. 15/Col. 1;24-28/Lk. 10; 38-42
Managsuon kining duha. Ilang igsuon si Lazaro kadtong tawo nga gibanhaw sa Ginoo.
Nagpuyo sila sa Betania ang dapit nga nagkahulogan og Balay sa mga Kabus. Higala sila ni Kristo Jesus.
Kining duruha dunay managlahing kinaiya. Kugihan si Marta ug nagkapuliki sa daghang buhat, samtang si Maria ang mogahin gyud og panahon alang kang Jesus. Sa tiilan ni Jesus si Maria attentive kaayong naminaw sa pagtulon-an.
Ang maong talan-awon nakapaalma kang Marta ug nagtukmod kaniya sa pagpangampa.
Apan gibadlong siya sa Ginoo dili tungod kay wala kini makadayeg sa iyang hospitality kondili tungod kay mas maayo gyud unta nga mamahimong balance ang tanan.
Sa atong kinabuhing Kristohanon mahinungdanon kaayo nga atong minyoon kining duruha. Active ug Contemplative Life sa pagkasimbahan.
Ang active life mao man kadtong apostolikanhong kalihukan ug kakugi sa simbahan alang sa pag-ebanghelyo sa katawhan.
Ang Contemplative life mao ang maampoong kinabuhi sa katawhan sa Dios. Gani, hangtud karon anaa pa man ang monasticism ang linaing matang sa pagkinabuhi kanila nga buot makig-uban sa Ginoo sa tanang adlaw sa ilang kinabuhi.
Apan kinahanglang balansehon ang tanan. Matud pa ni St. Francis de Sales: “Work without Prayer is a Vain Occupation, and Prayer without Action is a False Devotion.”
Si Marta atong inspirasyon sa pagkugi aron mabuhi ug si Maria atong inspirasyon aron kita magmainampoon, mamalandong, ug mohilom.