Luwas nga dalan

Usa sa dakong hagit sa bag-ong sekretaryo sa Departamento sa Transportasyon mao ang unsaon nga mahimong luwas ang kadalanan ug ang mga sakyanan nga magdagan niini.

Ang aksidente mahitabo bisan unsang orasa ug bisan asa. Apan ang labing komon nga dapit diin mahitabo ang aksidente anaa sa kadalanan. Usa sa taas nga nakatampo sa aksidente mao ang mga developing nga nasud.

Ang aksidente mahitabo dili tungod sa gidaghanon sa nagkalain-lain nga klase sa sakyanan apan tungod usab sa mga tawo ug kahayopan nga motabok sa dalan, nga inprastraktura nga gipabarog sa kadalanan.

Sigun sa datus sa Department of Health, ang aksidente sa kadalanan mao ang nag-unang hinungdan sa pagkamatay sa mga bata nga mas taas pa kun itande sa dengue. Sa Metro Manila lang duha ka bata ang namatay kada adlaw tungod sa aksidente sa kadalanan.

Basi sa taho sa Car Accidents Philippines gikan sa Metro Manila Accident Reporting and Analysis System, moabot sa 394 ka mga hamtong ug bata ang namatay tungod sa aksidente sa Metro Manila.

Sa kinatibok-an, adunay 14,553 ka mga aksidente sa kadalanan nga miresulta og kamatayon ug pagka-angol sa mga pasahero, drivers ug mga pedestrians. Buot ipasabot, mag average og 40 ka tawo kada adlaw ang namatay o naangol.

Sigun sa datus sa World Health Organization moabot sa 1.35 milyones ka mga kinabuhi ang gikuha tungod sa aksidente niadtong 2018 ug ang statistika sa Pilipinas nagtala og 12,000 ka mga Pinoy ang namatay sa aksidente sa kadalanan kada tuig.

Sa Metro Manila nagkataas ug midoble ang gidaghanon sa aksidente diin gikan sa 63, 072 ka hitabo niadtong 2007 ngadto na sa 116,906 sa tuig 2018.

Kasagaran sa mga hinungdan sa aksidente sa kadalanan mao kining  mosunod: sobra nga gikusgon sa pagpadagan, pagmaniho nga ubos sa inpluwensiya sa ilimnong makahubog, dili maayo nga pag-overtake, sayop nga pagliko ug jaywalking.

Maayo unta og maminusan ang aksidente sa kadalanan nga mikutlo na og daghang kinabuhi.