Ang kalisod maoy hulga sa seguridad

“National security is human security.” Mao kini ang gipadayag ni Professor Clarita Carlos kinsa mao karon ang National Security Adviser atol sa usa interview sa beteranang media personality Malou Mangahas.

Gipasabot niya nga dili lang ang pagtutok sa insurhensya sa nasud ug sa posibleng kasamok sa ubang nasud kon dili mas angayan nga hatagan og pagtagad ang panginabuhi sa katawhan.

Labaw sa tanan ang paghatag og solusyon sa problema sa kakabus sa katawhan nga maoy nagtukmod sa mga tawo nga nakasinati niini sa paghimo sa dautang binuhatan nga magmugna og problema sa seguridad.

Sakto gyud si Secretary Carlos sa iyang pamahayag. Kay kong mahatagan og kaharuhay ang mga tawo nganong mohimo pa man og krimen, nganong mosulod pa man sa bisyo.

Sa tinuod lang ang sagad matintal sa paghimo sa krimen kadtong mga tawo nga naglisod nga wala nay laing kapilian o gitawag nga kapit sa patalim. Aw, gawas lang niadtong hakod na kaayo sa kwarta nga dili makontento.

Kong ang mga tawo adunay kasegurohan sa pagkaon, kasegurohan nga adunay ikagasto sa panginahanglanon, kasegurohan sa pag eskwela hangtod makahuman ug makakita og trabaho segurado hapsay ug malinawon ang atong nasud.

Apan unsaon kaha kini mahatagan og katumanan? Naa pa kahay paglaum nga makab-ot kini? Yes mahatagan kini og katumanan kong maayo lang ang pagpatuman sa mga programa sa gobierno.

Sa bag-ong administrasyon positibo ang akong panglantaw nga matutokan ang mga suliran nga naglambigit sa panginahuhian sa katawhan.

Tinuod adunay mga pagduha duha nga mahimo ba kaha sa BBM-Sara ang ilang plataporma, sa akong bahin mas pilion nako nga motuo ug mosalig kanila nga mahimo nila ang gipanaad, dili man seguro diha diha dayon apan sa ngadto ngadto mahatagan og katumanan.

Ang nakaparat sa mga kritiko gihukman na nilang daan ang katakos sa mga bag-ong lider, imbis negatibo tan-awon sa nato ang maayong angulo nga maghatag kanato og paglaum.

Mao kini ang atong huptan karon, syempre ubanan sa suporta ug hugot nga pag ampo nga moabot ang panahon sa subli natong pagbangon.

Ang kalisod maoy dakong hulga sa seguridad sa nasud nga angayang tutokan sa mga naglingkod karon atong kagamhanan.