EDITORYAL - Build, build, build program ni BBM

Dunay dakong kahigayonan nga makompleto ug mapuslan sa mga Pilipino ang mga infra projects nga gisugdan ni outgoing president Rodrigo Duterte human nga ang bag-ong pangulo nga si Presidente Ferdinand Marcos Jr. mipadayag nga iyahang padayunon ang ‘Buiid, Build, Build’ projects sa iyang gisundang pangulo.

Ang nakanindot kang Marcos, siya na mismo ang nipadayag nga dili niya angkunon ang dungog sa maong mga proyekto. Sukwahi kini sa ubang mga presidente nga sa pagpuli og lingkod, wala gyud sila mohisgot og ingon niini ug migawas naman hinuon nga mura og sila maoy nipasiugda sa mga proyektong ilang naabtan nga gitrabaho, kay sa ila mang termino kini nakompleto.

Sa termino na ni Duterte nakompleto ang mga infra-projects nga gisugdan sa termino ni kanhi presidente Benigno Aquino III. Sa samang paagi, sa termino na ni Marcos mahuman ang mga infra-projects nga gisugdan sab ubos sa termino ni Duterte.

Usa sa mga maayong hiyas sa usa ka lider mao ang paghatag og importansiya sa kontribusyon sa ilang gipulihang lider ug dili angkunon nga iya ang dili iyaha. Gikinahanglan sa Pilipinas ang mga imprastraktura nga makabenepisyo ang tanan. Apan dili unta sa paagi nga malubong sa utang ang Pilipinas gikan sa gawas para lang kini makab-ot.

Mahimo kining himuon pinaagi sa public-private partnership (PPP) nga dili na kinahanglang mopagawas og pundo ang gobiyerno kay ang pribadong mga kompanya na tanan maoy mogasto sa katukoran sa mga proyekto.

Kini maoy angay buhaton sa mga dagkong proyekto sama sa railway system, dagkong mga pantalan, mga expressways, airport, dam, renewable energy electric power plants, ug daghan pang uban. Aron nga ang limitadong pundo sa gobiyerno magamit sa pagpalambo sa mga gagmayng mga taytayan, karsada, irigasyon, mga tunghaan, klinika, ospital sa mga hilit nga mga lugar nga maoy naa sa kinaiwitan sa serbisyo sa gobiyerno.

Dili unta sundon ni Marcos ang gihimo sa iyang amahan kaniadto nga si Marcos Sr. nga maoy gihimo ni Duterte aron matuman ang mga pangandoy niining mga imprastraktura pinaagi sa  pagpangutang og dako sa Pilipinas sa mag financial institutions sa sulod ug sa gawas sa nasud.