Cayetano supakero

Kadaghanan sa mga politiko magdinautay bisag tapos na ang piniliay. Hinuon, may pipila ka tarong ug ligdong nga angay ikapasigarbo natong Sugboanon. Sama nila ni anhing Kongresista Raul del Mar, Senate President and Chief Justice of the Supreme Court Marcelo B. Fernan ug Governor Emilio ‘Lito Osmeña.

Mangangalagad silang dili palaaway. Kondili, mahigugmaong moabag sa pangulo pagpamugsay paingon sa usa ug samang direksiyon. Sila nangamatay na. Apan dakong buhi ilahang flyover-skywalk bridges, Marcelo Fernan Bridge ug Trans Central Highway nga daw manguhit sa atong kasingkasing kada higayon sa atong pag-agi niining mga dapita.

Dili sama ni Senator-elect Alan Peter Cayetano, nga wala pa gani kalingkod si President-elect Bongbong Marcos (PBBM) nagpunay nag kontra sa mga vision-mission nga nahikyad nang daan ni PBBM sa miaging pangampanya.

Usa sa giinitan ni Cayetano, mao ang bahin sa pagpaminos sa presyo sa bugas nga himoong P20/kilo na lang, sumala sa gisaad kuno ni PBBM.

Sa tinuoray, wala mosaad si PBBM. Miingon ra, nga iyang tan-awon ug paningkamotan pag-ayo nga mapangitaag paaging makab-ot ang maong hagit. Pero dili kini madihadiha. Pastilan, nagpunay man hinuog pagawas og negatibong reaksiyon si Cayetano, uy! Gikopya, ang estilo ni Robredo!

Sa bagay, niadto pang 2016 election nga gipunayag tira ni Cayetano ang mga Marcos. Wala siyay maayong buot sa pamilyang Marcos labi na ning higayon nga ma-Presidente na si BBM.

Bisag gituboy na si BBM sa 31M kaping botante, gusto gihapon kining patikyaobon ni Cayetano.

Gani, nagtinguhang maoy modala unya sa Blue Ribbon Committee sa Senado aron kuno naay mokontra sa dili mahiuyonan nga pandayonong balaod ug mo-check and balance sa mga imbestigahanong kaso. Hayhayyy, pagkahabog og panan-aw sa kaugalingon!

Hinuon, hakog gyod nig gahom si Cayetano. Kadto lang may kasabotan sila ni Kongresista Lord Allan Velasco nga mag-term sharing sa pagka House Representative’s speaker, pastilan, pag-abot sa panahon, dili na man hinuon magpapuli ang supakero?

Walay palabra de honor si Cayetano. Dili team player. Babag sa kahiusahan nga maoy gustong ipasunod ni PBBM diha sa ilang pagpangalagad. Unta, dili siya hatagag taas puwesto sa Senado.

Buwahan, matangtangag ligid ning pagpunay niyag gukod sa mga bulawanong diskarte ni BBM nga makaasenso-bulahan sa atong nasod.