Ang tinuod nga bahandi

Pinasikad: Mateo 6;24-34

Kun asa ang atong bahandi atoa usab ang atong kasingkasing. Matag usa nato dunay giisip nga bahandi. Kining maong bahandi mao man ang nagdala kanato og kalipay. Kining maong bahandi mao man ang mosalamin kun sa unsang matang sa tawo kita maingon.

Ang bahandi bisan atong mahal wala man magpasabot nga atong seguridad. Ang tinud-anay nga seguridad anaa man sa Ginoo nga maoy tag-iya sa tanan bisan gani sa atong kinabuhi.

Gihimong sukaranan ni Jesus ang mga tanum, ang mga kalanggaman nga anaa lamang sa palibot.

Ang mga kalanggaman nga bisan pa man kun buhi karon apan ugma mahanaw na, apan sila gimahal man sa Dios. Gani dunay kanta kalabot niini gamiton kini sa matag higayon nga dunay catechism classes kaniadto.

Kini nagkanayon:

Ang mga langgam nga nagalupad gimahal sa Dios nga way paglubad/Ang mga langgam nga mahal sa Dios nga way paglubad/ayaw na kaguol/ igsuon ko!

Daghan nato ang buot gyud unta mamahimong dato. Daghang freebies matud pa ang kinabuhing dato.

Pagtagad sa kadaghanan, hayahay nga kinabuhi. Apan kining maong hayahay nga kinabuhi wala man magpasabot og malinawon ug malipayon nga kinabuhi. Sa tanang butang ang kalinaw ug kalipay dili gyud kabayran og salapi. Ang kalinaw ug kalipay maoy tinuod nga bahandi.

Dunay mga higayon nga ako maibog gyud sa mga bag-o ug maanindot nga mga sakyanan sa akong mga kaubang mga kaparian.

Normal nga pagbati apan sa dihang nakita ko nga namatay ug gilubong ang iladong pari ug maisip natong well off gyud ang pagpuyo nga namatay, nakaingon ko nga bisan gamay wala gyud tay madala sa lubnganan. Ang sense of contentment mahinungdanon apan pagkadakong elusive ba gyud niini alang kanato karon.