EDITORYAL- Husto ba o sayop ang gihimo sa Australia?

Wala mahimuot si Foreign Secretary Teodoro “Teddy” Locsin tungod wala mobotar ang Australia sa kandidato sa Pilipinas isip miyembro sa Commission on the Limits of the Continental Shelf (CLCS) nga unta giisip man kini nga kaalyado ug higala ug kapartner sa seguridad sa Asya Pasipipko.

Ang CLCS mao ang pundok sa mga eksperto  nga mopasabot ug mohatag og rekomendasyon aron sa pagresolba sa mga isyu bahin sa mga utlanan sa mga maritime o coastal nations.

Ang CLCS dunay 21 ka miyembro gikan sa nagkadaiyang nasud, sila maoy pinili sa ilang tagsa-tagsa ka mga nasud aron mokandidato.

Mga eksperto sila sa geology, geophysics o hydrography ug moserbisyo ubos sa ilang personal nga kapasidad. Sila maoy mohubad ug mosabot sa mga iduso nga mga  pangutana sa mga coastal states ug mohatag sila og scientific ug technical advice bahin niini.

Ang CLCS ubos kini sa 1982 United Nations Convention on the Law of the Sea (UNCLOS) nga mao sab ang niresolba sa kaso sa Pilipinas batok sa China bahin sa Scarborough Shoal niadtong 2016 nga diin nipabor sa nasud ang resolusyon.

Ang sentimiyento ni Locsin dunay punto. Kung giisip sa Australia nga kaalyado ug kapartner ang Pilipinas ilabi na batok sa agresibong gipangbuhat sa China pagpangilog ug pagpangangkon og teritoryo diha sa South China Sea.

Ang Pilipinas ug China dili maayo ang relasyon kun ang hisgutan kabahin sa teritoryo diha sa South China Sea nga diin nahimutang ang West Philippine Sea.

Apan dili kaha tungod kay dunay isyu ang Pilipinas ug China nga parehong nagilog sa teritoryo diha sa WPS maoy hinungdan nganong wala mobotar ang Australia sa kandidato niini?

Mahimong gibuhat kini sa Australia aron dili mabutang sa kauwawan ang Pilipinas ug mapasanginlan pa hinuon ang CLCS nga may gipaboran sa pagpagawas og rekomendasyon o resolusyon tungod kay usa sa mga miyembro niini, Pilipino.

Angay pa man gani tingali ipasalamat ni Locsin ang gihimo sa Australia kay usa kini ka maayong pamaagi aron nga magpabilin ang kredibilidad ug neutrality sa CLCS ug dili mapasanginlan nga bias.