Gipatuman na sugod kagahapong adlawa ang 31 pesos nga wage adjustment sa mga trabahante sa Central Visayas nga alang sa uban gamay ra gyud tungod sa grabeng pagsulbong sa presyo sa tanang palaliton.
Kong atong sawmon pud ang sitwasyon sa mga negosyante bug-at usab sa ilang panudlanan kining umento nga gipatuman apan wala silay mahimo tungod kay mao man usab kini ang nauyonan sa regional wage board.
Akong nahinabi kagahapong adlawa ang presidente sa Cebu Chamber of commerce and Industry CCCI nga si Charles Kenneth Co kinsa mitug-an nga tanan nilang mga miyembro compliant sa paghatag og umento sa suholan sa ilang mga trabahante.
Matud niya nga ang paghatag sa wage adjustment paagi usab nilang mga negosyante isip pasalamat ngadto sa mga trabahante nga nahimong katambayayong nila sa ilang panginabuhi. Busa haum lang nga bahinan usab nila kon unsa man ang kalamposan sa ilang patigayon.
Bilib ko sa hugpong sa mga magpapatigayon sa dakbayan sa Sugbo kay kong pamation ang ilang lider mora’g gaan man sa ilang kabubot-on ang pagpaambit sa ilang kita ngadto sa ilang mga tabahante sanglit mao man usab kini ang nakapalambo sa negosyo nila.
Ambot lang basin og kadtong mga bigtime businessman ang okay ra ang feelings apan kadtong nag ilaid pud ang patigayon kay wala pa hingpit nakabangon basin pud og gisakitan sila apan niluom nalang kay nasabotan naman og mao usab kini ang gipatuman nga wage increase.
Karong panahona magsinabtanay nalang ang mga mamumuhonan ug ang mga mamumuo aron maseguro nga dili maapektohan ang negosyo ug ang trabaho. Kay kong dili kini mabalanse parehong malunod ang negosyo nga ikalumos usab sa mga tawong nagsalig sa ilang panginabuhi. Matud sa pangulo sa CCCI nga dili bug-at ang 31 pesos nga wage adjustment kay sa gipangayo kaniadtong kapin sa 700 pesos kay seguradong dili na gyud sila kasugakod.
Tinood mumho lang kining 31 pesos nga wage adjustment sa mga trabahante. Apan angayan nga magpasalamat usab kay bisan gamay grasya naman kini nga ikapuno sa pagpamalit sa atong panginahanglan.
Budget lang gyud sa mga galastohan karon unsahon apektado man ang tanan sa nasinating krisis, dili magpakawala sa paglaum laban lang!