EDITORYAL - Pakigtigi ni Garcia sa nasudnong patakaran

Nagtigi na sab ang mga gahum sa mga opisyales sa Sugbu ug sa nasudnong policy makers kabahin gihapon aning mga health protocols. Ning higayona, ang kabahin sa executive order ni Gob. Gwendolyn Garcia nga dili na mandatory ang pagsuot og facemask sa gawas sa panimalay.

Si Garcia miluwat niini niadtong miaging adlaw Hunyo 9, 2022 nga nag-ingong mahimo rang dili magsuot og facemask sa gawas sa balay o mga open-air nga mga lugar.

Apan kinahanglang magsuot niini kun mosud sa mga establisamento nga dili kaayo maayo ang bentilasyon o ba kaha sa mga lugar nga daghang mga nagtapok nga mga tawo. Sumala pa sa gobernador, usa kini sa mga pamaagi alang sa pagpakabuhi na ubos sa new normal nga dunay Covid-19 sa palibot.

Apan kini gisaway dayon ni Interior Secretary Eduardo Año nga miinsister nga kinahanglan tumanon sa tanang mga local government units ang direktiba ni Pres. Rodrigo Duterte nga kinahanglang magsuot gihapon og facemask ang katawhan hangtud mapupos iyang termino.

Si Año miingon nga mahimo gihapong arestuhon sa kapolisan kadtong mga tawong dili magsuot og facemask o kadtong mga tawong moinsister nga nituman sa kamandoan ni Garcia.

Sumala pang Año dili nila ilhon ang EO ni Garcia tungod kay ang ilang tumanon mao ang IAATF Guidelines nga maoy giaprubahan sa presidente.

Si Año miingon nga ang padayong pagsuot og facemask, pagpabakuna ug pagkuha og booster shots maoy nakapaubos og maayo sa mga kaso sa Covid-19 bisan duna pay na-detect nga mga bag-ong variants niini.

Dili kay karon pa kini nahitabo nga nagkabangga si Garcia ug IATF Guidelines sa health protocols. Niadtong miaging tuig gikwestyon sa IATF ang direktiba sa gobernador bahin sa sistema sa quarantine ug swab testing nga gipatuman niini para sa mga langyaw nga biyahidor.

Si Garcia isip maoy local chief executive sa probinsya duna kini gahum ug kabahin sa iyang mandato ang pagpangita’g paagi sa kaayohan sa kinabag-an sa iyang mga konstituwente.

Apan dili na kinahanglan pang labaron sa mga tawo kun si kinsa nila ang husto, ang angay siguradohon sa tanan mao ang kaugalingon diskarte sa kaugalingong proteksyon. Magsuot man o dili og facemask.