EDITORYAL - Duol ra sa luwag ang gihataga’g ayuda

Kinahanglang himoan og imbestigasyon sa mga hingtungdang ahensiya sa gobiyerno kining mga alegasyong may kalambigitan sa mga conditional cash transfers, mga ayuda, sa lokal ug nasudnong kagamhanan.

Ang mga alegasyon naglakip sa mga nagdoble-dobleng nakadawat sa ayuda, halos tanang miyembro sa pamilya o suod sa mga kawani o opisyal sa barangay ang nakadawat sa ayuda, dunay say mga alegasyong ‘gi-bentot-bentot’ ra pagpili sa listahan ang mga pangalan sa pahatagan ug daghan pang uban.

Labaw sa tanan, hasta ang nangamatay giapil gihapon sa listahan sa makadawat sa ayuda. Kinsa man kahay mokobra niini? Kini samtang dunay mga angayan sab untang makadawat sa ayuda sa gobiyerno nga wala apila sa listahan, o tuyo nga gitangtang sa listahan aron makarga ang ilang pinalabi o mga ‘duol sa luwag.’

Seryuso kini nga akusasyon sa mga tawo, kwarta kini sa gobiyerno nga giyama-yamaan lang sa mga tawong gitahasan pagsigurong ang serbisyo niini makaabot ngadto sa mga labing nagkinahanglan ug dili niadtong mga suod lang sa mga naglingkod nga barangay officials.

Kinahanglang seryusohon kini pagimbestigar kay usa kini ka matang sa kurapsyon. Kung tinud-anay ang kampanya sa gobiyerno batok kurapsyon, kinahanglang anha kini sugdan sa barangay level.

Ang kurapsyon sama sa sakit nga kanser nga nitapot ug nikatap na hangtud sa kinaubsang level sa gobiyerno , hangtud karon wala pay nakab-ot nga kaayohan.

Bugtong solusyon aron mahinayhinayan kini og kawagtang mao ang seryuso sab unta nga pagpatuman sa balaod kontra kurapsyon.

Ang solusyon naa ra gihapon sa gobiyerno pinaagi sa paggukod niadtong ilang mga kawani, elected officials ug pagtaral kanila sa hukmanan ug pasilotan og pagkabilanggo. Dili lang unta ang Brgy. Poblacion Pardo sa Cebu City maoy susihon sa taga Department of Social Welfare and Services, kondili tanang mga barangay gyud.

Kaning mga nalambigit karon aning binuang sa pagpanglista sa makadawat og ayuda mao ra usab ang mga tawong nangusog nga dili madayon ang umaabot nga eleksyon sa Barangay ug Sangguniang Kabataan karong Disyembre 5, 2022. Gusto nila nga matabunan ang pagpangawkaw sa panudlanan sa barangay kun masublian pa sila og termino, kay nahadlok sila nga kun mapulihan, masakpan ang mga binuang nilang gihimo paggamit sa pundo ilabi na sa panahon sa pandemiya sa Covid-19.