Kapoy kaayo ang kalibotan. Daghan ang stress daghan ang suliran. Mao nga ning panahona karon daghan pud ang nangita og kahigayonan nga makapahuway diha sa kahilom.
Mahinungdanon gyud ang kahilom ang kahilom nga dili kabayran og salapi. Mag unsa man tuod ang daghan og bahandi apan dili ka malinawon. Ingon ini ang kinabuhi diha sa kahilom. Ania ang mga rason kun kinahanglan nga mogahin gyud kita og panahon diha sa kahilom. Naglambigit kini ning mosunod:
1. Angayan kitang mohilom aron atong usisahon ang atong kaugalingon.
2. Angayan kitang mohilom labina kun dili kita motungod sa mga tawo nga nagpalibot kanato. Kapoy og pakigsulti sa mga tawong dili nimo ka level ug labaw na sa mga tawo kang kansang mga utok sirado.
3. Angayan kitang mohilom aron kita mamahimong malig-on pagbalik diha sa atong kaugalingong kahimsog.
4. Angayan kitang mohilom labina ning mga panahon nga angayan kitang maningkamot aron mahatagan og focus ang atong kinabuhi kaysa kinabuhi sa uban.
Dili kahuyang ang pagpakahilom. Hinunoa ang pagpakahilom mahinungdanon aron kita mas maantigong mopahimutang kun unsay mahinungdanon ug kun unsay dili. Mao gyud tingali nga gamhanan ang pag-ampo ug makahupay sa balatiang espirituhanon. Kini tungod kay ang kahilom makahupay sa gubot natong pagbati.