Dear Atty. Divine,
Usa ko ka gwardiya sud na sa tulo ka tuig. Ang akong sweldo minimum apan matag adlaw 10 hours akong duty apan walay over-time pay. Nangutana ko sa among agency kun nganong di mi bayran sa overtime pay gitubag lang ko nga mamahimo rad aw ko mangita og laing security agency kun wa ko makauyon sa ilang polisiya. Pwede ba diay na attorney nga patrabahuon mi og 10 hours matag adlaw unya di mi bayran sa among overtime pay? Unsa may maayo namo nga buhaton? — Gerald
* * *
Dear Gerald,
Basi sa atong balaod sa Labor Code, ang empleyado obligado nga motrabaho matag adlaw sud lang sa walo ka oras. Kun mosobra sa walo ka oras ang trabaho sa empleyado kinahanglan nga bayran kini sa kompaniya sa iyang overtime pay. Ang imong pag-overtime kinahanglan sab nga nagagikan sa employer, dili mamahimo nga ang empleyado ra ang magbuot-buot sa pag-overtime sa trabaho. Sa imo nga kaso, dapat gyud ka nga bayran sa duha ka oras nga overtime pay matag adalaw. Ang imong buhaton karon kun ang agency di mobayad sa inyong overtime pay then mamahimo kamo nga mopadala og suwat-reklamo ngadto sa Department of Labor and Employment (DOLE) batok sa inyong agency. Sa inyong suwat sa DOLE inyong idetalye ang inyong reklamo ug ang pangan og address sa inyong agency. Apan kun mahadlok kamo nga magpaila sa inyong suwat-reklamo mamahimo nga dili lang ninyo itug-an ang inyong pangan sa inyong reklamo. Ang DOLE na ang mopahigayon og imbestigasyon ngadto sa inyong agency. Mas maayo nga inyo gyung atubangon ang inyong agency sa DOLE ug dili mo mahadlok sa inyong pagreklamo kay kamo man ang anaa sa husto nga position. Thank you and God Bless! — Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.