Dagan alang sa kaugmaon sa kabataan

Hangtud niining panahona wala pa gyud diay napabangon ang kadaghanan sa mga tunghaan sa dakbayan sa Sugbo nga gilabhan sa bagyong Odette niadtong Disyembre sa nakalabay’ng tuig.

Mokapin pa sa usa ka gatos ka mga eskwelahan ang nagpabiling miserable ang kahimtang sa ilang mga buildings nga gigusbat sa katalagman.

Moabot sa 60% niinini ang minor damage samtang 40% ang nagrabehan gyud ug gikinahanglan na untang maayo na kay nagsugod na sa pagpahigayon sa limited face-to-face classes diin giuna og bukas ang 13 ka mga tunghaan sa mga bukirang barangay sa Cebu City niadtong niaging semana. Target sa DepEd nga ablihan ang mga eskwelahan 100% sa dili pa mahuman ang school year.

Matud ni Dr. Rhea Mar Angtud, ang pangulo sa DepEd Cebu City Division nga P300 milyones pa ang gikinahanglan alang sa rehabilitation sa mga eskwelahan apan P6 million lang ang nahatag sa ilang nasodnong buhatan.

Aron makapadayon sila sa pagpaayo sa mga tunghaan mopahigayon sila og Run for a Cause nga ipahigayon karong Hunyo 4 diin target nila makatigom og pundo nga ipamalit og sin ug plywood nga magamit pangsalimbong sa uwan ug init.

Bukas sa tanan nga adunay kasingkasing sa pagtabang alang sa kaugmaon sa mga bata.

Nakadayeg ako niining inisyatiba sa DepEd sa dakbayan sa Sugbo kay wala sila magpaabot kanus-a dunggon sa kagamhanan ang ilang pangamuyo tungod kay nihimo sila og kalihokan nga makapadayon sa ilang tinguha pag umol sa kaalam sa mga bata.

Bisan ginagmay basta makairog ang tinguha nila sa paghatag og kaayohan sa mga tinun-an busa angayan kining suportahan.