Sa Lunes, Mayo 9 na ang adlaw sa paghukom kong si kinsa ang angayan natong hatagan sa tam-is ug dako natong "BOTO" human sa hataas nga panahon sa pagpangulitawo sa mga kandidato nga nagtinguha kuno nga moserbisyo sulod sa pila tuig.
Syaro og wala pa kitay nataypan nga kanunay man kita makakita ug makadungog sa tanan nilang pasalig nga balikbalik na bisan kaniadto pa sa mga nangaging aplikante ug napili sa pwesto, adunay natuman aduna usay napakyas.
Bisan pa man niini, padayon gihapon kitang nagpaanod sa tam-is nga bulatik hangtod gyud mailad ug itugyan ang tanan apil ang kaugmaon sa atong mga anak. Hinuon ang atong mahimo kutob lang sa pamasin nga dili na mahulog sa taro sa paghatag sa atong boto karong Lunes.
Kapila na kita nagsinggit sa giingon natong kausaban, nakab-ot ba nato kini? Sa tinuod lang wala gyuy nausab, kong naa man kausaban sa migrabe pa mga isyu o problema nga atong nasinati.
Kong gusto nato nga makaangkon og kausaban sugdan nato sa atong kaugalingon nga kinahanglang aduna kitay baruganan kong usay alang kanato maayo mao gyud kana ang atong himoon.
Sama sa pagpili sa mga ibutang nato sa pwesto kong nagtuo kita nga mao kini ang makatabang kanato ato gyud kining pilion ug dili kita magpadala kon kinsay sikat o kinsa buotan mao na kana ang angayan nga ibutang sa katungdanan.
Ako naay personal choice kinsa ang atong nagustohan apan dili lang nako ibutyag basta ang importante gikan sa akong kahiladman ang akong desisyon ug walay makabuot o makaimpluwensya kanako. Kay kong unsay resulta sa akong desisyon mamaayo o dautan man ako ra ang manubag sa akong kaugalingon ug sa akong pamilya, walay mahayay ug kabalo nga dili ko magmahay sa akong napili.
Walay bot-anay, walay dautay kay dili tanan tawo pareho ug gusto ug dili pud mahimo nga ihungit nimo ang imong nagustohan ngadto sa uban sama ra usab nga dili mahimo sa uban nga ipakaon nimo ang ilang nagustohan.
Ang adlaw sa paghukom dili lang adlaw sa eleksiyon kon dili ang mga adlaw nga nagserbisyo na ang atong mapili nga alagad sa nasud kong mahimo ba nila ang ilang gipanaad sa katawhan.