Kaayohan giandam ni BBM

Sayon ang pagpayil og Certificate of Candidacy didto sa Commission on Elections. Pero lisod ang pagdaog sa gidaganang puwesto ilabi na kon ang milansar nga politiko wala mailhi sa katawhan. Or kon nailhan man, pipila ra ka pudyot ang nakakita sa iyang mga maayong binuhatan sanglit dili siya hilig og publicity sa tri-media.

Ang pag-apil og sawom sa mahugaw’ng lim-aw sa politika, angay hunahunaon ug pangandaman sulod sa hataas nga panahon. Kay kon ang deretsong pagkaligo sa dagat ubos sa naglagiting nga kainit sa adlaw, maka-sunburn, sa politika sunogon sab ang imong pagkatawo ug bulingbulingan lakip na ang bansagon sa imong pamilya sa dili makaon sa iro nga mga isyu.

Kon walay hustong alamag sa politika, dili maayong magpatugatuga. Kay igo ka rang duladulaan sa mga tadhan. Diin, sa imong pagkadagma, igo ka ra nilang kataw-an ug biyaan. Tan-awa, unsay nahitabo ni Manny?

Lahi ra siya sa matang sa kinaadman nga nahuptan ni Bongbong Marcos (BBM) diha sa pagpakigkombati batok sa malinglahong tuyok sa politika. Kay una mihukom si BBM nga molansar pagka presidente, migahin siyag katuigan sa pagtuon unsay angay buhaton aron makat-on ang katawhan sa pagmahal kaniya ug siya maoy pilion ug padag-on?

Segun sa kasaligang tinubdan, naghinapos pa lang ang tuig 2020, mipahimo na’g feasibility study si BBM sa tibuok nasod aron masayran kon asang lugara nga kusog o hinay siya? Sa wala pa ko moretiro, sagad sa mga retired military, kinsa mag-adtoan sa akong trabahoan, mipadayag nga diehard Marcos loyalists sila. Ug kon molansar kuno si BBM, solid nila kining suportahan.

Usab, may gisuweldohang grupo ang mga Marcos, pagpangitag mga dagkong luna sa lainlaing dapit nga mapalit alang sa nahunahunaang tukorong mga inprastraktura nga mapuslan sa katawhan ingkasog sa maayong kapalaran, si BBM ang modaog.

Gani, sa Cordova may 50 kapin ka ektarya na kunong yuta ang napalit-giandam. Ug giplanohang tukorag eskuylahan, ospital, recreation center ug ubang kapanginabuhian sa nanginahanglan.

Pagkanindot! Sa hilom paagi, gimontar daan ni BBM ang luna nga mamahimong tuboran unya sa kaayohan para sa tanan.

Gitagong pagpangandam sa pagpangalagad nga momatuod sa makanunayon niyang pagpalanog-pamulong atubangan sa daghang katawhan: “Sama-sama tayong babangon muli!”