Nga motuo kamo sa pinadala sa Dios

Pinasikad sa: Juan 6;22-29

Anaa ang tutulo ka mga teolohikanhong birtud nga giangkoban sa Pagtuo, Paglaum ug Paghigugma. Ang Pagtuo kabahin naman gyud sa matag tawo regardless sa atong kagikan ug kultura.

Kini tungod kay ang tinguha alang sa Dios anaa naman sulod sa atong kasingkasing. Mao nga gitawag kining anthropological. Lisud ang motuo labina kondili kita kombinsido.

Ang atong pagtuong Kristiayano Katoliko dunay tutulo ka kinaiya. Kini naglangkob ning mosunod:

a. Trinitarian

b. Communitarian

c. Missionary

Trinitarian sanglit nagasukad man kini sa Santisima Trinidad. Nakaangkla kita sa Usa ka Dios nga dunay tulo ka mga persona.

Communitarian kun katilingbanon. Ang atong mga pag-ampo, panlimbasog dili man usa ka kinaugalingong panlimbasog.  Katilingbanon kining pangindahay nga unta ang tanan mamahimong usa. Dugang pa ang pagtuo nga walay buhat usa man ka patay nga pagtuo.

Missionary kini tungod kay ang pagtuo ingon nga gasa dili lamang angay tipigan.

Ang pagtuo ingon nga gasa kinahanglang atong ipaambit aron sa ingon mas mapakaylap pa gyud nato ang pulong sa Dios sugod mismo sa atong kaugalingon (Mission ad Intra) ngadto na sa tanang suok sa kalibutan (Mission ad Extra).

Usa sa mga dakong hagit kanato karon mao man kun unsaon nato ang pagsangyaw sa atong pagtuo sa mas makahuloganon nga paagi.

Ang hagit alang kanato mao man nga unta kita motuo sa pinadala sa Dios walay lain ang atong  Ginoong Jesus.