Nahimong sumsoman sa mga netizens sa social media, partikular sa mga supporters sa duha ka higpit nga magkaribal nga kandidato sa pagka-presidente ug bise presidente sa nasud ang gidaghanon sa mga tawong nanambong sa tagsa-tagsa ka grand rallies nga gihimo dinhi sa Sugbu ning semanaha.
Niadtong adlaw nga Lunes, Abril 18 gihimo ang BBM-Sarah Uniteam Festival Rally nilang kanhi senador Ferdinand “Bongbong” Marcos Jr. ug Davao City Mayor Sara Duterte-Carpio, diha sa 30 ka ektaryang luna sa Filinvest sa South Road Properties. Apan matud pa nga tulo ka ektarya lang niini maoy gigamit sa maong kalihokan.
Samtang niadtong adlaw nga Huwebes, Abril 21 mao sab ang Ceboom Peoples Rally sa giabangang lima ka ektaryang bakanteng luna sa reclamation area sa Mandaue City. Nagsige og lalis ang mga supporters sa duha ka habig diha sa social media padaghanay sa mga nanambong. Nakadugang kini sa kaaktibo sa mga kasikas karon sa umaabot nga piniliay.
Sa SRP rally gibanabanang moabot 200 mil ang nanambong, samtang sa Mandaue rally gibanabana sa kapolisan nga moabot 50 mil (alas-8 sa gabii), samtang ang mga organizers niini miingon nga 300-320 mil ang nanambong.
Aron mahatagan og gamay nga ideya ang katawhan, ang sa SRP tulo ka ektarya ra ang nagamit samtang sa Mandaue upat ka ektarya sumala pa sa kapolisan kay ang usa gibutangan sa stage, mga emergency vehicles ug VIPs ug uban pa.
Tungod lisud man kining pamatud-an pinaagi lang sa mga pagbana-bana sa mga hingtungdang mga opisyal ug organizers nga dunay mga kaugalingong interes para sa ilang mga gilabanang kandidato, mas maayo nga ang publiko nalang maoy pahukmon base sa mga nanggawas nga hulagway. Hinuon, pagkatinuod dili man kini maoy tinud-anay unya nga resulta sa piniliay sanglit ang uban niini nangadto lang aron manan-aw og mga artista ug banda. Dili tanan mobotar gyud sa mga kandidatong gikampanya. Ang Sugbu usa sa mga gitawag og vote rich province sa Pilipinas pinaagi sa gibanabanang kapin tulo ka milyong rehistradong botante.
Bisan tipuon pa ang nanan-aw sa maong duha ka rallies wala kini makatunga sa kinatibuk-ang gidaghanon sa rehistradong botante sa Sugbu.
Nagpasabot kini nga duna pa gihapoy tsansa ang ubang kandidato sa pagka-pangulo ug bise presidente.