Kon maglantaw ko sa atbang nga bungtod gikan sa among gipuy-an, dili nako kapugngan nga mobati’g kaluoy sa mga tag-iya og kabalayan nga nakay-ag tungod sa bagyong Odette, apan wa sila makapaayo sa ilang balay kay wa man hatagi’g hinabang.
Unsaon nga mas nauna pa man hinoon sa pagpanghatag og hinabang ang mga wa magub-i og panimalay kay lagi sila mga suod man sa gitugyanan sa pagpanglista. Usa ko sa wa mahatagi og tabang, apan sagdi na lang kay may kwarta pa man ko.
Nakasaway gyud ko nga giuna hinuon sa paghatag og hinabang ang mga tag-iya og balay nga wa gyud maguba sa bagyo, samtang kami igo lang sa pagbagotbot. Bisan gani si Mayor Michael Rama napikal sab niini.
Ang maayo unta kadto nga giuna paghatag og hinabang kadtong mga nagub-an gyud og balay. Sama nako nga ang akong tibook atop gilupad gyud sa bagyo.
Tinuod, pagkaugma dayon, napabalik nako ang atop sa akong panimalay kay nanuhol man dayon ko og duha ka bantay ug upat ka alalay, aron magtinabangay sa pagtaod pagbalik sa akong atop.
Usa ka tag-iya og balay nga nakay-ag gyud tawon sa bagyo, wa kapugong sa paghilak kay matud niya hangtod karon wa gyud siya’y kwarta nga ikapatukod pagbalik og balay.
Para kanako sayop ang argumento sa uban nga angay’ng hatagan ang tanan kay nasakripisyo man sab kuno sa bagyo, kay nag-antos nga way kuryente, way tubig, nahasol kay way kasaykan ug uban pa nga rason.
Aw, kon mao man gani kana ang rason, angay tingali nga doblehon ang ihatag nga tabang niadtong mga nagub-an gyud og panimalay.
Dagko baya kaayo’g ngisi sa mga nakadawat og tag P5,000 dinhi sa Cebu City bisan og wa maguba ang ilang balay.
Para nako, oki lang kon mauwahi ko nga makadawat, apan lahi ang estorya kon may mga wa magub-i og panimalay apan nauna pa nako’g dawat.
***
Karon, dili na kuno makapanghatag og hinabang ang Cebu City government tungod sa pagdili sa Comelec kay maisip kini nga pagpamalit og botos.
Awhag nako sa mga sakop ni Mayor Rama nga ayaw ninyo huwata nga mahuman ang eleksyon, pagsuwat na kamo og “request for exemption” sa Comelec.
Tingali makasabot ang kadagkoan sa Comelec niini, kadtong mga siyudad ug lungsod nga grabeng naigo sa bagyong Odette.
Kon paabuton ninyo nga mahuman na ang eleksyon, basin og kadtong mga opisyal nga mapilde, kapoyon na unya nga motrabaho aron ang katawhan makadawat sa para kanila.