EDITORYAL - Pangandam sa ting-init

Dili palang dugay sa dihang opisyal ng gipahibalo sa Philippine Atmospheric, Geophysical and Astronomical Services Administration (PAGASA) ang pagsugod sa tinginit ug kinahanglang pangandaman ang kainit ug kaigang ning panahona.

Maayo nalang nga ang tinginit karon walay kadungan nga huwaw nga makonsiderar nga katalagman para sa tanan tungod kay siguro gyung maapektahan ang mga maguuma nga nag-prodyus sa pagkaon.

Tungod niini, mabantayan sab nga magnihit na ang paguwan ug dili na unya mapuno ang mga natural nga tambakanan sa tubig diha sa kabukiran nga mao sab ang tinubdan sa tubig gikan sa mga dam ug mga atabay nga kuhaanan sa mga tubig para sa tanan.

Maapektahan sab niini ang mga mag-uuma tungod kay magkinahanglan man sila og tubig pangbisbis sa ilang mga pananom.

Usa niini ang grabeng bationg kainit sa sud ug sa gawas sa balay hinungdan nga mosaka gyud ang konsumo sa kuryente tungod sa electric fan, aircon ug bugnaw nga mga ilimnon.

Ikaduha mao ang konsumo sa tubig sa mga tawo samtang hinayhinay sab magkanihit ang suplay sa tubig

Mao nga angay gihapong pangandaman sa tanan ang ting-init bisan og walay huwaw, karon palang kinahanglan nang mohimo og mga lakang ang mga local government units pagpugong nga dili dako ang epekto sa ting-init sa tanan.

Dili na unta paabuton pa sa mga LGUs nga motiyabaw na ang mga mag-uuma o ang mga tigsuplay og tubig sa mga komunidad nga nihit na kini.

Usa niini mao ang pagpadayon sa mga tree planting activities diha sa kabukiran ug sa mga bakanteng luna sa patag.

Maayo sab kini nga oportunidad nga limpyohan ang tanang mga kanal, imburnal, ug mga kasapaan gikan sa lapok ug mga nabarang basura aron sa pagabot sa tinguwan, mamenusan ang pagawas niini tungod sa baha.