EDITORYAL - Rebolusyon panahon sa krisis?

Dili haom sa panahon ug dili sab maayong paminawon para sa katawhang Pilipino ang paglusad og rebolusyon karong naa pay pandemiya ug dunay kalibotanong krisis mugna sa gubat didto sa Eastern Europe.

Mahitungod kini sa panawagan sa usa ka retiradong heneral sa militar kansang kataposang tahas mao ang pagbuntog sa insurhenisya sa komunista dinhi sa nasud.

Ang maong kanhi opisyal sa militar mao si retired major general Antonio Parlada Jr. kinsa maoy nangulo sa National Task Force to End Local Communist Armed Conflict nga responsable sa daghang mga kaniadto rebeldeng New People’s Army nga ni-surrender ug nibalik sa sabakan sa gobiyerno.

Nakontrobersiya lang ang maong buhatan nunot sa red-tagging issues human daghang mga kritiko sa presidente ang gipangpasanginlang supporters sa mga rebeldeng komunista.

Ang matud pa rason sa rebolusyon nga panawagan ni Parlade mao ang pasangil niya nga kurapsyon diha sa Comelec. Si Parlade misuway unta pagkandidato pagka-pangulo apan na-diskwalipika tungod sa teknikalidad.

Matud pa sa iyang pasangil gipangayoan siya og dakong kantidad sa Comelec aron nga makonsiderar ang iyang kandidatora. Matud niya maputol lang kining kurapsyon kun mag-rebolusyon.

Wala pay giluwatang pamahayag ang Comelec bahin sa mga pasangil ni Parlade.

Apan ang Armed Forces of the Philippines ilabi na ang Department of National Defense mipasalig nga dili nila sakyan ang panawagan ni Parlade.

Ilang gipasalig nga ang kasundalohan sa Pilipinas dili modapig ni bisan kinsang politiko ug magpabiling matinud-anon lamang sa Konstitusyon.

Sa panahon nga dunay krisis, dili maayo para sa katawhan  nga duna pay politikanhong krisis nga mahitabo sa gobiyerno.

Karong mga panahona sa kalisdanan, mas gikinahanglan sa katawhan ang lig-on ug may kredibilidad nga gobiyerno nga masandigan.

Kung dunay mga kahiwian nga nakita si Parlade, mas maayong adto niya kini idangop sa korte o ba kaha sa kongreso.