Merkado dili puy-an

Dili malalis nga kon hingpit na nga matukod ang bag-ong mga public market building diha sa gitawag og Freedom Park, Warwick Barracks ug sa nahimutangan karon sa Carbon Market Unit 1 ngadto sa Unit 3, nindot na unya ang atong merkado.

Ang merkado nga sukad sa dugay na kaayong katuigan, gihulagway nga gubot pa’s lukot, ilabi na kadtong Warwick Barracks kaniadto nga sa wa pa masunog, gipuy-an na og mga tawo, gitukoran na og mga balay.

Para kanako, ang merkado dili gyud unta puy-an, apan unsaon nga nagpasagad man ang tagdumala sa kamerkadohan kaniadto mao nga ang Warwick Barracks ug Freedom Park, nahimo na nga balay.

Karon, may tinguha ang atong mga opisyal nga panindoton ang merkado sa Cebu City, apan sanglit kuwang man og budget ang siyudad nga magamit sa pagpatukod, nakigsabot sila sa pribadong kompaniya nga maoy motukod sa market building nga kantidad og bilyon.

Nakakita na ko sa architectural design sa pagatukoron nga mga market building, ug nindot gyud tuod kaayo. Ang reklamo lang sa mga vendors mao nga private company kuno ang gipahimo sa building ug maoy modumala sa merkado.

Naa nay nahuman pagtukod nga building sa Unit 2, ug nindot gyud tuod kaayo. May kausaban gyud hinoon unya ang operasyon sa Carbon Market kay dili na tugotan nga may mangatulog sa merkado.

Kon duna go’y mangatulog sa tindahan, hugaw ang merkado. Sama karon, ang Quezon Boulevard nga karsada ra gyud unta, gipuy-an na og mga tawo, nga anaa sa ilang mga tindahan.

Dihang gikoral sa Market Authority ang daplin sa karsada kaniadtong miaging semana, miulbo ang kaguliyang kay dili man sila mosugot nga butangan og puthaw nga kural ang daplin sa karsada atubangan sa ilang tindahan ug panimalay.

Karon, ang abogado sa mga vendors mihulga nga mokiha kang Raquel Arce, kay matud pa bisan og siya pa ang market administrator apan wa kini katungod nga mopapahawa sa mga vendors.

Basin og nakalimot lang si atorni nga si Raquel Arce mao usab ang gitugyanan ni Mayor Michael Rama sa pagdumala sa PROBE Team, ang clearing team sa siyudad.

Bisan ang amigo nako nga si sir Erwin Gok-ong sa CEMVEDCO dili supak sa pag-modernize sa Carbon, apan gusto unta niya nga ang Cebu City maoy mohimo sa building ug dili pribadong kompaniya.

Apan unsaon man, tan-aw nako, kuwang og budget ang syudad para niini kay daghang gastohanan mao nga napugos kini pagsulod og Joint Venture Project sa GMR Megawide.

Aw, kon nindot na ang Carbon, modas-ag na gyud diha ang mga pumapalit, ilabi na kon dunay luna nga maka-park ang mga sakyanan ug wa nay mga snatchers.