Sa kataposan human sa taas nga panahon sa Oplan Puyo sa dakbayan sa Sugbo gipulihan na gyud kini sa Oplan Kagawasan sa mga tawo, mora’g ni-graduate na kita sa pagpig-ot sa atong kagawasan gumikan sa nasinati nga pandemya.
Kini ang gianunsyo ni Cebu City Mayor Mike Rama atol sa pagsaulog sa ika-85 nga kasumaran sa pagkahimong dakbayan sa Sugbo nga gipangamahanan sa iyang apohan nga Don Vicente Rama.
Gipatuman sugod kagahapong adlawa ang Oplan Kagawasan human napirmhan sa mayor ang naasoyng kamandoan nga gitayming gyud sa Charter Day celebration.
Makapalipay ug makapaluag sa dughan nga madunggan ang ingon niini nga lakang sa atong mga lokal nga kagamhanan nga maghatag og balik sa atong kagawasan ilabi na sa mga bata nga kapin na sa duha ka tuig natanggong sa mga pinoy-anan.
Wala gyud alang-alanga sa dakbayan tungog kay gibuksan ang tanang establismento nga mapanginabuhi ug gitugotan na usab ang tanang mga tawo nga makasulod nga walay pag pihig. Ang mga bata ug tiguwang, bakunado ug dili bakunado gitugotan nga makaadto sa gusto nilang adtoon nga walay daghang kuskos balongos. Gilibkas na usab ang curfew gawas lang sa mga menor de edad nga naa gyuy ordinansa niini, sa mga dagko pwede na nga maka morning the night.
Apan kining kagawasan nga gihatag sa mga tawo adunay dakong kaakohan sa matag usa kanato nga dili angayan nga abusohan, gikinahanglan ato kining ampingan aron padayon natong matagamtaman ang kaanindot niini.
Hinuon, dili kumo gihatagan na og kagawasan magpasagad nalang usab sa mga pagabuhaton. Ayaw gyud intawon kay bisan unsang orasa mahimo kining bawion sa higayon nga mosaka na usab og balik ang kaso sa COVID-19 kay nagdanghag ang mga tawo.
Angayan nga isilsil sa alimtakan sa katawhan ang atong responsibilidad dili lang sa atong kaugalingon kondili sa tanan tawo nga anaa sa atong palibot. Maghiusa kita nga mamintinar kon unsa kining atong natagamtanan karon aron dili na bawion pa kay simbako lang basin igo ra kitang patilawon sa kinabuhing gawasnon.
Sa tinuod lang dili pa hingpit ang atong freedom karon tungod kay anaa pa ang virus nga kanunay nangita og buslot aron makaatake sa mga tawo busa motuman kitang tanan sa minimum health protocol.
Kadtong gustong magpabakuna hala himoa na kong mao kini ang makatabang aron magpabilin ang atong kagawasan. Apan dili man usab kini pinugsanay busa kadtong mga dili gyud magpabakuna paneguroha lang nga dili mataptan pinaagi sa pag amping kanunay.
Ang kagawasan nga atong naangkon niining panahona hinulaman lang nga mahimong bawion kong gikinahanglan.