Giabusar na og maayo sa mga netizens ang ilang kagawasan sa pagpadayag pinaagi sa social media bahin sa nagsingabot nga piniliay. Sagad mga supporters sa nagkadaiyang mga kandidato sa pagka-presidente.
Kun tan-awon ang mga posts karon sa social media, ilabi na ang Facebook daghan kaayong mga post karon may kalabotan sa umaabot nga piniliay. Daghang mga memes, misinformation, fake news, ug uban pa aron mangdaut sa kandidato.
Gisaw-an ug gipasapasa sa mga tawo, ilabi na sa mga supporters sa nagkadaiyang mga kandidato sa pagka-presidente. Apan makita sa tanan kun kinsa nga supporters sa mga kandidato ang labing bastos ug kadtong nagpabilin pa ang maayong pamatasan.
Apan sa mga hut-ong sa nagkadaiyang supporters, duna gyuy molabaw sa tanan nga maoy kusog kaayong mopasa-pasa og mga fake news ug misiniformation nga walay kukahadlok aron lang biay-biayan ug dauton ang kaatbang sa ilang kandidato.
Wala na silay kahadlok bisan ang ilang gihimo mahulog na nga kalapasan sa cyberlibel ug cybercrime, basta ang ilaha lang mga modaghan ang makabasa sa ilang pagpangdaut ug patuohon ang uban sa bakak nga maoy ilang gustong ipatuo.
Hain naman ang mga otoridad nga mo-regulate niini? Dili ba duna may mga regulasyon aning paggamit sa social media?
Subo lang nga ang social media bukas kaayo sa tanan lakip sa mga kabataan. Ang mga bastos ug walay pamatasang komentaryo nabasa sa mga kabataan.
Magbinastos diay aron ipakita ang kunohay hugot nga suporta sa kandidatong gustong botaran? Mao ba kini ang atong gustong makat-onan sa kabataan ? Ang pagkapalaaway?
Dili ba mahimong morespeto nalang sa baruganan sa uban? Dili ba mahimong gamiton ang social media sa pagpakatap sa kamatuoran ug dili ang mga hinimohimo ug walay mga basehanang pangangkon nga mopabor lang sa usa ka kandidato?
Ang angay gani mao nga siguraduhon sa mga botante nga ang makadaog kadto gyung dunay kapabilidad ug kapasidad pagtrabaho.
Ini og human sa eleksiyon dili unta mahisama sa nahitabo karon nga dunay mga nagmahay nga lunod-patay nga mga supporters , kun pananglitan ang ilang kandidato maoy modaog ug molingkod og unom ka tuig nga walay maayong nahimo.