Usa sa nakalangay sa Visayan Electric Company sa pagpabalik sa among suplay sa kuryente sa Casili, Consolacion mao ang napanit nilang secondary lines. Di tungod sa bagyong Odette kon dili tungod kay gikapyotan sa mga kable sa mga kompaniya sa telepono.
Maong napugos ang ilang mga inhinyero sa pagputol sa tanang daan nga mga kable ug pagkutay og bag-ong secondary lines. Nalangay nang daan, nadugangan pa gyod og pila ka adlaw ang ilang trabaho una nahatagan og suplay sa kuryente ang among mga tangke sa tubig ug silingan nga kabalayan.
* * *
Karong nagladlad nag bag-ong mga kable ang mga telco, nitanyag mi pagtabang sa Visayan Electric (kay di man sila kaato pagbantay sa kalapad sa ilang franchise area gikan sa Liloan sa amihanan paingon sa San Fernando sa habagatan) pagpatuman sa mga probisyon sa ilang joint pole agreement:
• Ilang mga kable kinahanglang di moyungyong og mas ubos sa 18 feet aron nga di masabod ang dagkong sakyanan;
• Ilang mga kable kinahanglang ilang ilhon pinaagi sa pagbutang og color coding tag; ug
• Ilang mga kable kinahanglang bugkuson aron kalikayan ang spaghetti wires.
* * *
Akong nahibaw-an gikan sa mga representante sa mga telco nga ilang gituman ang sugo sa color coding sa mga kable. Samtang pulos itom ang mga kable nga atong makit-an sa mga poste, gibutangan diay og stripe sa kolor nga gidestino sa gobyerno sa ilang mga kompaniya:
• Orange para sa Converge;
• Blue para sa DITO;
• Puti para sa Globe;
• Puwa para sa PLDT; ug
• Puwa sab pero mas dako ang kable sa SkyCable.
* * *
Maong sa sunod higayon nga may magyungyong nga mga kable sa kadalanan nga makahulga sa mangagi nga mga sakyanan, di na magtudlanay ang mga telco kinsay sad-an. Ang nagpakabana nga mga motorista ug local government units (LGUs) sayon rang makalili unsay kolor sa stripe aron matawgan ang telco sa di pa mahitabo ang mas dakong kadaot.
Hinaot nga samtang mao pay pagbarug pagbalik sa mga poste ug pagkutay pagbalik sa mga kable, magkauyon nang Visayan Electric, LGUs ug pribadong sektor pagtinabangay. Aron wa nay pansit nga mga kable. Ug, labaw sa tanan, kalikayan ang pagkakalas sa mga kinabuhi ug pagkagusbat sa kabtangan.
* * *