Kon kutawon man gani ang atong panghunahuna

Nahimong daw sama sa dula sa basketball ang bugnong lugaynon ning mga panahona karon. Anaa ang substitution. Kining maong kapasikaran nahimong daw sa nakakutaw sa panlantaw sa mga tawo ug kanila nga buot moboto ning panahona. Pun-an pa sa mga dumadapig nga daw malisod kaayo pakgangon diha sa iang akto sa pagpanlaban kun pagdapig sa ilang mga kandidato.

Dunay mga tawo nga sa tinud-anay lang ako nang gipalay-an sanglit dili nako maagwanta ang kahaguka sa ilang baruganan. Tingali, tungod kay duna kitay gipaabot nga kausaban? Ug unsaon man pud tuod nato kining maong kausaban kun kita mismo dili buot nga mahitabo kini.

Tungod kay nahimo naman kitang kontento sa gipakitang labok sa mga nagdumala kanato nga kun atong paladman kaugalingon lamang nila ang ilang gisud-ong. It’s a prank lamang ang tanan.

Padayon pa ta niini? Unsaon kaha pagpatuman sa atong pag-ampo no kun ugaling mao na lamang kini ang dagan sa pangutok sa kadaghanan. Mag-unsa man tuod ang kaisog sa giidolo kun kinaiya niini daw sinindikato?

Sa panahon nga kita kutawon diha sa atong  panghunahuna atong hinumdoman ang gitudlo ni San Ignacio de Loyola labina kun maghisgot kita og discernment. Kini naglangkob ning mosunod:

Intellectual Level diin atong hunahunaon ug kwentahon ang advantages versus disadvantages kun ugaling padayonon nato ang atong desisyon.

Kun sa atong tan-aw maglabi gyud ang kadaut nan, sayop ang atong desisyon. Ang sympathy votes dili makatabang aron mamahimong hapsay ang tanan. Lunod patay ang atong pagdapig kay dili man kita buot moangkon nga sayop kita sa atong desisyon nga gihimo.

Affective level diin suhiron nato ang atong pagbati kun padayonon nato ang maong desisyon sa pagpili ning mga tawhana. Malipayon ba kita o dili? Ug kun libog ang atong kutaw nan, dili makatarunganon nga mohimo kita og desisyon. Sayop gyud kini kun buot hunahunaon.

Dili ka rebelde kun ugaling mangutana ka. Gigamit lang nimo ang imong utok ug dili ka buot nga mamahimong kutaw ang imong panghunahuna.