Kun wa ang demonyo sa ato pa?

Walay Ginoo. Kini ang tubag nako sa usa ka madre nga ni-claim nga ang tanang mga giingong demonic possessions pagaisipon lamang nga psychological maladies. Nakabase sa Indonesia ang maong madre ug tingali tungod sa iyang naghinobrang kahibalo sa sikolohiya mao nga iyang nataligam-an ug kun ugaling sayud siya niini, iya lang gyud nga gipakagamay ang gilatid sa Nicene Creed: He Created All Things Visible and Invisible.

Alang nila ang demonyo pagaisipon man nga mga symbolic lamang ug bunga sa ilusyon sa tawo. Ang Dios segun sa atong nahibaw-an mao man ang nihimo sa tanang mga butang makita ug dili makita. Apil sa dili makita mao man ang mga anghel. Hinuon matud pa sa katesismo ang uban sa mga anghel nahimong mga masupilon ug nisukol sa Dios. Sila ang nahimong mga yawa ug ang ilang gisaligan way lain kondili si Lucifer ilang pangulo. Kun atong i-negate ang presensiya niini sama ra nga gi-negate nato ang nagbuhat sa mga anghel nga mao ang Dios? Nahimo silang yawa dili tungod sa Dios kondili tungod sa ilang gipili. Gumikan sa garbo nahimo silang mga yawa.

Apan subo palandongon nga ning panahona karon, daghan ang nasobrahan sa ilang kalantip ug kahibalo. Daghan ang nahimong daw sama sa Google sanglit anaa nila ang tanang tubag sa mga pangutana kalakip na pud sa mga butang misteryoso. Apan ang pinakasakit niini mao man ang pagtuo nga ang tawo sama na gyud sa Dios ang ilang kaugalingon.

Sa mosugot ta ug sa dili dunay krisis nga nahitabo gyud sa atong pagka simbahan kun kaniadto nagpabiling lig-on ang papasiya ning mga panahona karon, padayong gitay-og si Francisco sa mga batikos. Dili lang kini kalabot sa mga baruganan ingon nga konserbatibo o progresibo, tingali tukmang panahon tingali kini sa pag-angkon sa salaod nga atong nahimo nga mao ang paghiklin ug pagsalindot sa Dios ug sa Tradisyon nga atong giisip nga haligi sa atong pagka Kristohanon.

Maayo man nga anaa ang vade mecum isip tamdanan sa atong pagpakabuhi ingon nga katawhan sa Dios apan kun kagubot o dili ba kaha bunga lamang sa eksperimento ang tanan, nan, mas maayo pa nga magpuyo.

Quo Vadis Petrus?