Kinahanglan gyud tingaling estriktuhon na ang pagtuman sa speed limit para sa tanang mga sakyanang mangagi diha sa mga dagkong taytayan nga nagkonektar sa mainland Cebu ug sa Mactan Island.
Kini aron mapugngan ang mga aksidente sa naglambigit sa mga sakyanan ilabi na sa mga dagkong trak ug sa mga gagmay nga sakyanan sama sa mga motorsiklo.
Niadtong adlaw nga Sabado, usa ka motorsiklo nga hinay ang dagan gikan sa Mandaue City ug misaka sa Marcelo Fernan Bridge ang naligsan sa usa ka dakong trak.
Ang insidente nakuhaan og footage sa closed circuit television camera sa taytayan ug nakita nga naabtan gyud sa dakong trak ang motorsiklo hinungdan nga nadumbolan kini ug naligsan.
Kung dunay speed limit, minimum ug maximum limit nga gisunod sa tanang mga sakyanan nga molabang sa mga taytayan dili kadto mahitabo, walay maabtan ug wala say madisgrasya.
Apan sa pagpatuman niini, kinahanglan nga mosunod gyud tanang motorista nga molabang. Sa samang higayon, duna gyud untay enforcement sa maong speed limit aron nga magmatngon gyud ang mga motorista.
Enforcement nga seryusong ipatuman ug bantayan gyud aron walay malapason ug walay mahitabong aksidente.
Kay usahay, kun walay magbantay nga makabadlong dili na manumbaling ang mga motorista sa pagpadagan bisan og nabutang na sa peligro ang ilang kinabuhi ug sa ubang road users.
Ang maong aksidente nahitabo sa mas lapad nga taytayan kun itandi sa karaang Mandaue-Mactan Bridge nga two-lane ra maong makapahibulong kun nganong naghuot gyud sa pidpid sa maong taytayan ang motor ug ang trak nga paspas kaayo ang dagan.
Ang mga ingon niini nga aksidente sa kadalanan maoy usa sa rason kun nganong importante gyud kining pagestrikto na sa paghatag og lisensya sa mga buot momaneho og sakyanan sa kadalanan.
Kinahanglan gyud ang disiplina ug pagpakabana para sa kaugalingon ug sa ubang motorista aron malikayan ang disgrasya.