Kinahanglan gyung hatagan og pagtagad sa mga hingtungdang ahensiya sa gobiyerno kining makaluluoy nga sitwasyon sa mga gwardiya o mga security guards nga ubos sa pagdumala aning mga nagkadaiyang security agencies.
Usa ka maayong propesyon ang pagka-gwardiya. Apan dili kini maoy numero unong gustong propesyon sa mga tawo, ang uban napugos pagsulod niini tungod kay walay laing kapilian subay sa makaya sa ilang kinaadman.
Apan mao sab kini ang rason kun nganong dunay daghang gwardiya nga nagbantay karon sa mga establisamento nga wala gani kompletong papeles, wala moagi og training, naglago ang uniporme, kuwang sa mga gamit ug ang uban wala pa gyuy lisensya ang mga armas, kun duna may armas nga giisyu, gubaon o ba kaha walay bala. Makainsulto para sa mga gwardiya kining pagpanglupig sa mga security agencies. Kay gawas anang mga nahisgutang mga kakuwangon nga angay untang ihatag sa ilang mga gwardiya, ubos sab kaayo sila og hinatagan sa sweldo.
Ang uban walay mga benepisyo gikan sa PhilHealth, PagIbig Fund, SSS ug uban pa. Dunay ubang security agencies nga tungod sa kahakog, lapas na sa walo ka oras ang duty sa ilang gwardiya unya wala pa gyuy overtime pay. Ang nakapait, kung moreklamo hulgaon man dayon nga papangitaon nalang og laing security agency nga makahatag sa ilang gipangita, asa man sila mangita ana?
Mao kini ang tinuod nga sitwasyon sa mga gwardiya karon mao nga usahay magsipok ang ilang ulo ug magkasayop-sayop na hinuon sa ilang trabaho ug ang uban mahutdan og pailob tungod sa paugatay kaayo nilang mga security agencies ug makahimo na hinuon sila og krimen.
Ang mga tagiya og security agencies kugihan kaayo mangita og mga kompanya nga gusto nilang serbisyohan, apan kutob ra sila pagbutang og gwardiya ug mokolekta sa bayad anang kompanyaha.
Pagabusar kini sa kahimtang sa gwardiya nga nangita og panginabuhian sa tinarong nga paagi. Maayo unta og tanang mga kumpanya mag-estrikto sab sa pagpili og security agencies ug dili magtihiktihik aron way security agencies nga moabusar.
Karong umaabot nga eleksyon, duna untay politiko kun modaog karong piniliay molingi ug motan-aw sa kahimtang sa mga gwardiya sa nasud karon.