Sulbad nga tsamba-tsamba
Kon simbako matakdan sa COVID-19, unsay imong palabihon: Nga pugson ka pagpuyo sa isolation center nga may pagkaon pero hugaw ug way ubang batakang panginahanglan; o pasagdan sa imong pinuy-anan nga way hinabang nga pagkaon, way tambal ug way magsusi sa imong kahimtang sa panglawas?
Ang unang kapilian nabantang sa tanan tungod sa managhigugmaay nga nihangyong mag-isolate sa ilang bay pero gihudlat nga ipa-polis ug gihan-ok sa Cebu City Central School kansang mga higdaanan way habol ug unlan, hugaw ang pansayan, way tubig ug way silhig nga ikalimpiyo sa palibot.
* * *
Ang ikaduha akong nahibaw-an gikan sa kaparyentihan ug kahigalaan sa duha ka pasyente nga igo lang gi-text nga positibo ang resulta sa ilang swab test pero wa na pahibaw-a asa sila ipahimutang: Ang unang pasyente nagpuyo og boarding house sa Carcar City diin siya nagtrabaho; samtang ang ikaduha taga Cebu City.
Pulos sila naproblema sa ilang pagkaon kay di man makagawas. Maayo na lang nga ang taga Cebu City gitabangan sa iyang mga higala nga nagpulipuli sa pagpadala og pagkaon kada adlaw hangtod nga nahuman ang iyang quarantine.
* * *
Mas naglisod ang taga Carcar kay layo sa iyang mga paryente. Kay di man mahimong magtanggong sa iyang kaugalingon nga mamatay sa gutom, nigawas sa iyang kuwarto. Dihang way nibadlong niya, nakumbinser nga wa pahibaw-a sa iyang sakit ang tagduma sa boarding house.
Maong niadto siya sa merkado aron pagpamalit og pagkaon. Wa siyang kahibawo kon nakatakod ba sa ubang nangompra. Pero nakabatyag nga gipasagdan siya sa gobyerno nga maningkamot sa iyang kaugalingon.
* * *
Nakatunong ba lang ang managhigugmaay og kawani sa Cebu City Healh Department nga nagtuo nga ang pagpanghudlat kabahin sa iyang trabaho? Naatlan ba lang nga wa kalimpiyohi ang City Central? Nakatsamba ba lang ang laing duha ka pasyente nga puno ang isolation facilities maong napasagdan?
Ang masulub-ong kamatuoran mao nga ang nahitabo nila maoy simbolo sa kaliboan ug usa ka sayop sa pagduma sa pandemya. Ang pag-atiman sa mga pasyente, pagtambal sa mga masakiton ug pagpugong sa tinakdanay wa ipasikad sa siyensiya ug mga paagi nga napamatud-an nang epektibo. Kon dili sa unsa lay nahunahunaan sa mga tagduma ug unsay buot sa mga tigpatuman.
* * *
- Latest
