Tungod sa nasinating injury sa original opponent ni Manny Pacman Pacquio nga si Errol Spence, gipunit nila ang Cubano’ng si Yordenis Ugas isip hulip nga maoy makigsangka alang sa WBA Super Welterweight title. Nahitabo kini sa gitawag nga 11th hour o mubo na kaayo nga panahon.
Dinhi pa lang daan nahimadlan na nako nga mapilde si Manny kay kasagaran gud sa mga ingon niini nga sitwasyon kadtong tawo nga kalit lang ipaslak mao ra gyud ang mogawas nga mananaug.
Dili lang tungod kay giswerte si Ugas kon dili sa iyang katakos nga napakita niya atol sa ilang kombate ni Pacquio.
Si Pacman dugay nga nangandam sa ilang away ni Spence. Apan dihang kalit nga mipuli si Ugas, mubo nalang kaayo ang preparasyon niini sa estilo ni Ugas. Busa usa kini sa nakaapekto nga halos tanan kinumo sa Cuban boxer nakaigo gyud kaniya.
Bisan og gipuli ra si Ugas kang Spence, dugay na niining gitun-an ang lihok sa boxing legend nga nakatampo sa iyang kadaugan.
Kompiyansa ra kaayo ang team ni Pacquiao ug siya mismo nga gipakagamay ang katakos ni Ugas. Busa sayon ra nilang gidawat ang paghulip niini kang Spence, wala gani nila tan-awa ang posibilidad nga naay dramang nahitabo o gihimo sa iyang mga kontra aron maseguro nga dili niya mabawi ang titulo.
Bitaw, deserving si Ugas sa iyang kadaugan kay gipakita niya nga bisan og dili bastabasta ang iyang kontra nga si Manny apan wala siya magpaapekto ug gitinuod gyud ang kombate hangtod nakab-ot ang kadaugan.
Gawas nga kompiyansa ang team Pacquaio, daghan usab ang naghamok kaniya nga mga issue ilabi na sa kalibutan sa politika nga nakakibhang sa iyang concentration.
Karon nga napilde si Pacman, unsay sunod mahitabo? Sa mga nagkatag nga mga tarpaulin dunay nakasuwat nga Pacman Man of Destiny, seguro ang pasabot niini sa boxing nga siya ang makadaug. Pero nasayod naman seguro ang tanan nga duna siyay ambisyon sa mas taas nga position, ang pagka presidente, ipadayon kaha gihapon niini ang pagpapipi sa 2022 election?
Basin barugan niini nga siya gihapon ang Man of Destiny nga mangulo sa nasud. Huwaton nato ang iyang hukom, ang iyang kapildihan kang Ugas basin dautang tilimad-on sa iyang ambition.
Napilde man sa iyang kontra’ng Cubano nga si Yordenis Ugas, magpabilin gihapon nga kampiyon si Manny Pacman Pacquiao sa kalibotan sa sangka sa kinumo. Siya lang ang nag inusarang Eight-Division World Champion nga nakatatak na sa kasaysayan.
Big salute to Pacman sa maayong labok nga gipakita ibabaw sa ring. Kong moretiro man o dili si Manny ra gyud ang makahukom, basta naa pay makwarta sa boksing hala bira apan tan-awon usab niya kon kaya pa sa lawas.
Kong hingpit nga moretiro ni Pacman, magpabilin na siyang People’s Champion. Apan si Ugas ang Man of Destiny nga kataposang nakaaway ni Manny ug mibuntog kaniya.