Ang Mission Society of the Philippines natukod niadtong tuig 1965 sanglit ang mga kaobispohan niadtong mga panahona, nakaamgo nga timely na kaayo ingon nga nakadawat sa gasa sa pagtuo gikan sa mga langyaw, makatarunganon lamang nga ipaambit ang bisan unsa nga atong nadawat mao nga anaa ang Mission Ad Gentes.
Mao nga sukad niadto daghanan sa mga Pilipino ang nagmaisogong mopaambit sa maong pagtuo ngadto sa mga langyaw sa tanang suok sa kalibotan.
Tugoti ko nga akong hatagan og linain nga kahulogan ang MSP nga titulo. Kini bunga usab sa akong yanong pamalandong sa dihang gihimo namo ang among Santos Ehersisyos dili pa lang dugay.
M ingon nga “Mapasalamaton” sa pagtuo nga nadawat. Kon wala man gud ang pagpasalamat nan, malisod alang kanato ang pagkamanggihatagon. Manggihatagon dili lang panahon sa mga special collections labina gyud sa pagsaulog nato sa Mission Sundays kondili ang pagkamanggihatagon sa atong kaugalingon diha sa pagsakripisyo ug pag-ampo alang sa atong mga Misyonero, ma local man o international.
S ingon nga “Seryosong”buhat kini. Labina ning mga panahona karon.
Ang kinasingkasing nga pagtahan sa kaugalingon aron magpabiling mapuslanon ug makahuloganon ang simbahan hangtud karon, usa man ka dakong hinungdan nga mamahimong relevant gihapon ang atong paningkamot nga pastoral.
P ingon nga “Paningkamot” ug “Pag-ampo” nga unta mas mapasabwag pa ang mensahe nga iya sa Dios ngadto sa tanang katawhan sugod sa tagsatagsa nato ka mga nataran. Lisod man tuod rong mga panahona, apan dili mahimong imposible ang tanan alang niini.