Bulawang napupo mahal kaayo

Bug-at kaayo alsahon ang barbel nga may 127 ka kilos sa clean and jerk lift, unya babaye pa’ng moalsa, si Hidilyn Diaz, kinsa taliwala sa pagpangmangtas sa COVID-19, naningkamot taman sa ginhawa nga makapadayon sa pag-ensayo kuyog sa iyang coach bisan didto ra sa baratohong lugar sa Malaysia.

Init, ulan ug singot sa pagpangandam iyang giantos tungod lamang sa usa ka damgo, nga pag-abot sa gikatakdang adlaw sa torneyo didto sa 2020 Tokyo Olympics, iyang mahatagag halandumong pasalubong ang mga Pinoy – ang pagdalag gold medal inig uli niya sa Pilipinas.

Tuod man, kini natuman. Human siya sab-ongi og medalyang bulawan, isip maoy kinahawran sa 55-kilogram weightlifting women’s category, giulan dayon siyag minilyong salapi-pahalipay o incentive: P10M gikan sa atong gobiyerno base sa Republic Act 10699, pledges nga P10M gikan sa MVP Sports Foundation, 10M sa business tycoon Ramon S.

Ang, P3M ni Deputy Speaker Mikee Romero. Ug uban pang adunahang tawo ug kompaniyang misaad paghatag og dugang minilyong salapi, condo unit ug house and lot.

Pastilan, sa iyang pagkahinangpit-salig sa Ginoo, labi na sa pinaling yugto nga gisugdan niya’g kumot-isa ang bug-at tubo nga nagdugtong sa mas mga bug-at pang aserong ligid, diin sa hilom siya nag-ampo nga unta hatagag dugang kusog nga makaalsa-isa niini hangtod ngadto sa kinatas-ang dapit, si Hidilyn wala mahigawad.

Milampos siya pagkab-ot sa gipangandoyng kadaugan. Human sa diyotayng segundos nga pag-antos pagpinugong sa kabug-at, gibundak ni Hidilyn sa sawog ang barbel dungan ang pagsiyagit-hilak sa tumang kalipay, sanglit dili siya makatuo, nga ang butang nga daw imposible niyang madaog, nahimong posible.

Sa usa ka interview tapos sa maong kadaugan, emosiyonal siyang mipahayag-tug-an: “Nasorpresa ko na nagawa ko yon. Kakaiba si God.”

Dinhi gimatuod ang giingon sa Ginoo: “Pangayo ug makadawat mo. Pangita ug inyong makaplagan. Tuktok ug ablihan ang pultahan alang ninyo.’ (Mateo 7:7)

Busa, no wonder. Nga wala lang mapupo ni Hidilyn ang unang medalyang bulawan sa Olympic Games para sa Pilipinas.

Mibaha pa gyod ang minilyong grasya nga sa kalit lang nakapahimo niyang milyonariya. Dili lang sa materyal ug moral nga aspeto. Kondili, lakip na gayod sa espirituwal. Bahanding mas labaw pa kamahal kay sa bulawan.