EDITORYAL - Pag-amping sa mga bata

Nagmatngon unta ang mga ginikanan sa ilang mga anak nga nakabalik na og duwa-duwa karon sa gawas sa ilang mga panimalay bisan naa pa gihapoy pandemiya sa Covid-19 ug dili pa tanang tawo ang nabakunahan batok niini.

Dili palang dugay gitugotan sa Inter-Agency Task Force nga makagawas-gawas na ang mga 5-anyos pataas nga mga bata. Kini human sa kapin usa ka tuig nga gidid-an silang makagawas sa balay tungod sa Covid-19.

Apan ang pagtanggong kanila nakaapektar sa ilang himsog nga pagdako. Apil niini ang ilang abilidad sa pakighugoy-hugoy sa mga kaparehas nilang mga bata, ang panghunahuna ug kagawasan nga makaduwa isip usa ka bata.

Daghan ang nalipay sa dihang gitugtan na silang makagawas ilabi na kadtong mga batang kansang mga ginikanan seryuso gyud sa pagprotektar kanila nga dili masakit.

Apan nabantayan sa Banat News nga diha sa mga kabarangayan wala na magsuot og facemask ang mga bata samtang nakigduwa sa mga silingan. Dili kini sala sa gobiyerno kondili sala sa mga ginikanan mismo.

Angayan unta nga sila mismo maoy mosiguro nga luwas ang ilang mga anak diha sa gawas tungod kay posibleng makakuha sa maong sakit ang mga bata samtang nakigduwa.

Karong dunay nagkalain-laing mga variants na sa Covid-19 partikular kining gitawag og delta variant nga mas paspas nga manakod, maayo tingaling siguradohon sa mga ginikanan nga kun mogawas sa balay ilang mga anak, magsuot gyud kini og proteksyon ug tudloan sila bahin sa social distancing ug sa peligro gikan sa Covid-19.

Sa samang paagi, ang mga barangay usab unta dili molugak sa ilang pagbantay 24 oras nga badlungon kadtong wala magsuot og facemask ug wala motuman sa social distancing.

Nabantayan nga ang gibuhat sa mga barangay, alas-10 na sa gabii o oras sa curfew pa sila mo-roving aron mamadlong ug papaulion ang mga menor de edad dungan sa mga hamtong.

Dili ba mas maayong anha sila mag-roving sa mga oras sagad manggawas aron magduwa ang mga bata?

Kay anang paagiha dili nila kinahanglang badlongon ang mga bata ug gamiton kini aron i-edukar ang mga bata bahin sa health protocols.