Pagkamakanunayon
Dili gyud mahanaw sa akong panumdoman ang sugilanon mahitungod sa lumba sa bao ug sa kuneho. Ang kuneho mapagarbohon kaayo nga siya gyud ang mamahimong mananaug ug dili ang bao. Sa akong bahin, tinuod man sab gyud nga ang bao maoy mamahimong mananaug. Hilom lang kaayo ang bao ug hinay kining niaginod.
Ang sugilanon nagtudlo kanato nga ang dunay pailob ingon man paglahutay mao lamang ang makadaug ug dili ang paspas apan walay pailob. Ang paglahutay kinahanglanon labina gyud ning mga panahona karon nga daw nahimong kaluha nato ang kalisod.
Nganong kinahanglang magpailub ang matag tawo? Kinahanglanon kini tungod ning mosunod nga rason:
1. Una, dunay mga higayon nga dili dayon matuman ang bisan unsang atong gilaraw. Mao kinahanglang magpaabot.
2. Ikaduha, anaa gyud kanunay ang mga babag. Atong himoon nga sila mapapas kay nagdala man sila og langay mao nga pangitaon ug pamalandongan ang hustong pamaagi aron sila mapapha.
3. Ikatulo, ang hustong kinaiya alang sa kalampusan kinahanglanon kay kun wala kini nan, malisud ang pagkab-ot sa gitawag natong kalampusan.
4. Ikaupat, may tukmang panahon ang matag butang. Mao nga dili sa tanang higayon nga mohimo kita og mga lakang segun sa atong kusog ug panghunahuna. Dunay mga higayon nga kinahanglang atong bawogon ang atong garbo ug kahibalo aron magpakabogo kuyog sa mga bogo aron sila sa kadugayan matakdan unta sa kalantip ug hustong panghunahuna. Ning paagiha nahimo kitang magmalampuson pinaagi sa paghimo sa atong mga lihok nga susama sa tubig nga mohulma segun sa iyang sudlanan.
5. Ikalima, anaa gyud ang mga kritiko mao nga malangay ang pagpatuman sa atong mga laraw. Ang bugtong paagi sa pagpahilom kanila mao man ang paglatid sa mga sukaranan nga mopaluya sa ilang pagbati diha sa ilang walay hinungdang pagpanggukod.
Pailub mahinungdanon kaayo. Kun sa panan-aw sa kadaghanan ikaw napakyas, hinumdomi nga si daghang mga siyentipiko nakahimo og mga bag-ong discoveries nga niagi una og dili maihap nga mga kapakyasan kun maghisgot kita og mga experiments.
- Latest
