Sakto ang sulti sa kapin sa 200 ka mga pangulo sa kalibotanong mga grupo nga naglakip sa kapin sa gatos ka kanhi presidente, primero ministro ug foreign ministers sa ilang suwat sa Group of Seven (G7), ang pito ka labing adunahan nga demokratikanhong nasud:
Ang pagtabang sa pagbakuna sa katawhan sa labing kabus nga mga nasud sa kalibotan di buhat sa kaluoy kon dili aktibo nga pagpanalipod sa kaugalingon; kay di mabadlong ang pandemiya sa COVID-19 kon ang adunahan nga mga nasud kutob ra sa pagbakuna sa ilang mga molupyo.
* * *
Sakto sab ang sulti ni US President Joe Biden sa iyang pagtampo og $4 bilyones sa COVAX sa United Nations (UN) ug World Health Organization (WHO) ug pagpanghatag og 80 milyones ka doses sa Pfizer, Moderna, AstraZeneca ug Johnson & Johnson ngadto sa nagkalainlain nga kanasuran, apil na ang Pilipinas, sa mosunod nga unom ka semana:
Way koral nga may igong kahabog ug way kadagatan nga may igong kalapad nga makapanalipod sa kahimsog sa mga Amerikanhon kon magpabilin nga di mabakunahan ang kinabag-an sa katawhan sa labing kabus nga kanasuran.
* * *
Pero kinsa man ang unang motakilid aron pagkuot sa ilang panudlanan sa pag-amot sa gibanabana nga $66 bilyones (P3 trilyones) nga gastohan sa pagpamalit og mga bakuna nga igong makahatag og herd immunity sa tibuok kalibotan sa mosunod nga duha ka tuig?
Giawhag ang Estados Unidos, Britanya, Japan, Italya, Alemanya, Pransiya ug Canada sa pag-angkon sa kinatibuk-ang gasto, o $44 bilyones (P2 trilyones), puno sa ila nang nahatag nga tabang sa COVAX.
* * *
Tingali mas malumoy ang panudlanan sa adunahan nga mga nasud kon mapasabot ang ilang kadagkoan sa labing yano nga katin-awan sa dinalian nga panginahanglan sa pagbakuna sa tanang kanasuran batok sa COVID-19:
Kon pasagdan ang labing kabos nga mga nasud nga masiyam-siyaman sa pagpamalit og mga bakuna, padayon nga mo-mutate o mausab ang kagaw ngadto sa mas bangis nga variants nga mahimong di masagang sa mga bakuna nga nahatag na sa katawhan, maong inay mabadlong magpadayon ang pandemya sa pagpanghasi sa laing lawod sa katalagman, nga ang labing maigo mao ang mga ekonomiya sa industriyalisado nga mga nasud.
* * *